Por Europa Press / Redacción | SANTIAGO DE COMPOSTELA | 01/04/2020 | Actualizada ás 12:39
A venda de coches en Galicia foi dun total de 1.215 unidades en marzo, o que supón un esborralle do 64,4% --duns 2.200 automóbiles menos matriculados-- debido ao impacto do estado de alarma en comparación co mesmo mes do ano anterior.
Este retroceso en Galicia é lixeiramente inferior á abrupta caída que tamén se produce na media española, que é do 69,3%, segundo datos das asociacións de fabricantes (Anfac), concesionarios (Faconauto) e vendedores (Ganvam).
A forte caída experimentada en marzo nas vendas de coches explícase pola expansión do coronavirus e as medidas adoptadas polo Goberno, entre as que destaca a limitación de mobilidade da poboación, o que motivou o peche dos concesionarios e a práctica paralización do mercado automobilístico.
No acumulado dos primeiro trimestres, as matriculacións en Galicia foron 6.762, o que se traduce nun descenso do 31,7% respecto ao mesmo período de 2019.
"GOLPE" NO SECTOR
As matriculacións de turismos e todoterreos en España alcanzaron un volume de 37.644 unidades durante o pasado mes de marzo, o que supón un esborralle do 69,3% na comparativa coas 122.659 unidades entregadas no devandito mes do ano anterior.
Anfac, Faconauto e Ganvam explicaron que a suspensión total da distribución e comercialización de vehículos desde o pasado 16 de marzo, polo coronavirus e as restricións do estadode alarma, representou "un grave golpe ás matriculacións", que se sitúan por baixo do nivel dos peores meses da crise económica.
CANLES DE VENDA
Por canles de venda, as compras por parte de particulares caeron un 67,5% o mes pasado, con 16.871 unidades, á vez que as empresas adquiriron 12.613 unidades, un 66,9% menos, e as firmas de aluguer, 8.160 unidades, un 74,9% menos .
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.