Unións Agrarias pide usar os plans de desenvolvemento rural europeos como "salvavidas" do sector agrogandeiro

Unións Agrarias pediu á Consellería do Medio Rural o uso dos fondos comunitarios vinculados aos plans de desenvolvemento rural (PDR) como mecanismo de aval e financiamento que sirva de "salvavidas" para facer fronte ás dificultades nas que se atopan as explotacións agrogandeiras polo peche das canles comerciais debido á crise sanitaria do COVID-19.

Nun comunicado remitido aos medios, o sindicato sinala que o coronavirus supón unha ameaza sistemática e global sobre a sociedade e a economía que esixe "rápidas respostas" que permitan anticiparse aos danos que a crise terá sobre o tecido rural. "En Galicia hai sectores enteiros especialmente ameazados pola caída da demanda actual das súas producións en canles específicas de comercialización, como o sector ovino caprino, o de carne de vacún e o sector vitícola", sinala.

Nesta situación, a organización agraria considera "prioritario" evitar o colapso do sector agrogandeiro galego por falta de liquidez para o que considera "vital" dispor medidas inmediatas de reforzo da renda, nas que subliña que un plan de desenvolvemento rural urxentemente reorientado e modificado "pode xogar un papel fundamental".

O sindicato lembra que o pasado xoves a Comisión Europea aprobou unha serie de medidas urxentes que permitirán dar flexibilidade ao fondo Feader para que cada estado membro e cada rexión da Unión Europea (UE) poida reorientar a aplicación destes fondos para tomar medidas que permitan paliar os danos sobre o sector.

Ante estas cuestións, Unións Agrarias pide "con máxima urxencia" a posta en marcha inmediata, neste mesmo mes de abril, dunha "profunda reorientación" dos fondos dos plans de desenvolvemento rural. Por iso, urxe que a Consellería convoque á comisión de seguimento destes plans por vía telemática.

NECESIDADES DA VITICULTURA

Precisamente, este sábado, noutro comunicado remitido aos medios, o sindicato reclamou á Xunta un plan de contención das perdas que está a sufrir o sector da viticultura nas denominacións de orixe de viño ourensás.

Unións Agrarias subliña que a "falta de liquidez" que experimentan moitas pequenas adegas pola falta de vendas na restauración provocará un efecto arrastre sobre a base dos produtores que verán como terán que deixar produción sen recoller e que a que sexa vendida teña unhas cotizacións mínimas.

Agroforestería | Fonte: calibre-agroforestry.org.