A TVG programa viaxes virtuais, cinema e celebracións relixiosas para a Semana Santa
O Venres Santo, por primeira vez na historia, non haberá 'Luar', pero, no seu lugar, programarase o especial 'Luar, canto te boto de menos'.
Por E.P. | SANTIAGO DE COMPOSTELA | 06/04/2020 | Actualizada ás 14:16
A Televisión de Galicia programará durante os próximos días contidos para facer aos seus espectadores máis levadía a Semana Santa en casa, a través de viaxes virtuais, programas especiais, cinema e celebracións relixiosas, entre outros elementos.
Aínda que sexa 'desde casa', a Televisión de Galicia levará aos espectadores de viaxe virtual a Ferrol, Viveiro, Fuciño do Porco, banco de Loiba ou Camariñas, a través dos programas 'Actualizad@s', 'Fun polo aire' e 'Aquí Galicia'.
Ademais, pasará a horario de máxima audiencia, ás 22,30 horas o mércores, a histórica serie 'Pratos combinados', que emitirá tres capítulos consecutivos. O xoves, o 'Land Rober Tunai Show' estará dedicado ao público.
O Venres Santo, por primeira vez na historia, non haberá 'Luar', pero, no seu lugar, programarase o especial 'Luar, canto te boto de menos', que levará aos espectadores o mellor deste espazo de entretemento, o máis lonxevo da televisión en España.
Ademais, o magazine de tarde 'Quen anda aí?' non parará o Xoves e o Venres Santo e, para completar esas tardes festivas, ofrecerase o especial de 'Inimitables: baila na casa' e recuperarase 'A liga dás familias extraordinarias'.
Outro dos elementos centrais da programación desta semana Santa será o cinema, con títulos para todos os públicos como 'Pan, viaxe a nunca xamáis' e 'A grande aventura do golfiño Winter 2', así como películas clásicas como 'Ben-Hur' ou 'Quo Vadis'.
Na noite do domingo haberá unha dobre ración de intriga cun novo capítulo de 'O sabor das margaridas' e a estrea da película 'Secuestrados', producido pola galega Vaca Films.
CELEBRACIÓNS RELIXIOSAS
Ademais, os espectadores poderán seguir as principais celebracións relixiosas de Semana Santa, que serán en pechado pola epidemia de COVID-19. A G2 ofrecerá o Xoves Santo a misa que oficiará o arcebispo de Santiago, Julián Barrio, ás 18,00 horas, e o Venres Santo retransmitirase a celebración da palabra.
O sábado emitirase, tamén pola G2, a vixilia pascual (20.00 horas) desde a catedral de Ourense. Dous especiais lembrarán xoves e venres (ás 17.00 horas) as principais procesións que adoitan celebrarse nestas datas en Galicia e o labor de confrarías e irmandades.
