Organizacións galegas súmanse á reclamación estatal para reabrir os mercados de proximidade

González Formoso propón un grupo de traballo entre administracións para reactivar a economía galega. A Xunta pide ao Goberno que os agricultores poidan aprazar a autoliquidación do IVE do primeiro trimestre. Pola súa banda, Alu Ibérica renovará este venres a actividade na súa planta da Coruña.

Por Europa Press / Redacción | SANTIAGO DE COMPOSTELA | 08/04/2020 | Actualizada ás 13:22

Comparte esta noticia

Numerosas plataformas, o Sindicato Labrego Galego (SLG) e asociacións ecoloxistas galegas sumáronse á reclamación que realizaron case 600 entidades a nivel estatal para pedir ante o Ministerio de Sanidade e de Consumo a reapertura dos mercados de proximidade.

Así o trasladou este mércores o SLG nun comunicado no que informou sobre esta petición ao Ministerio de Sanidade e ao de Consumo, na que reclaman a reapertura dos mercados alimentarios, a aposta pola produción local e medidas fiscais como a exención do pago de autónomos ás pequenas granxas.

Todas as organizacións asinantes reivindican que a Administración "dite instrucións pertinentes ás comunidades autónomas e aos concellos para que se busquen solucións para os mercados non sedentarios de proximidade". Argumentan que o "peche xeneralizado" dos mercados alimentarios están "a xerar custos inasumibles aos produtores locais".

Tanto é así, explican, que esta situación "está a afectar profundamente" aos seus modos de vida e que, ademais, "está a incrementar o desperdicio alimentario" pola "imposibilidade de dar saída aos seus produtos". Na misiva enviada tamén precisan que "o máis grave" é que "non cheguen á cidadanía alimentos básicos, frescos e máis sans" que os procesados.

Por todo isto, para "mitigar o brutal impacto económico" que provoca a pandemia nas economías do sector primario, o Sindicato Labrego solicitou "un esforzo" por parte da diversas administración para que "aposten polas producións locais, as de orixe extensiva e as agroecolóxicas na compra pública de alimentos" para fornecer a hospitais, centros de maiores, comedores sociais, escolares ou bandos de alimentos durante o estado de alarma.

Tractor rozando unha leira. EMDESFOR - Arquivo
Tractor rozando unha leira. EMDESFOR - Arquivo | Fonte: Europa Press

AUTOLIQUIDACIÓNS DO IVE

O conselleiro de Medio Rural, José González, mantivo unha videoconferencia co ministro de Agricultura, Luis Planas, e o resto de conselleiros do ramo, na que expuxo diferentes reivindicacións do sector en Galicia, como a petición de que os agricultores poidan suspender a autoliquidación do IVE do primeiro trimestre.

Neste sentido, José González demandou que se poidan regularizar no segundo trimestre as autoliquidacións do primeiro --deben estar presentadas o 20 de abril e pídese facelo o 20 de xullo-- ou que se permita facer esa declaración do primeiro trimestre con datos de 2019.

E é que o conselleiro explica que agricultores e gandeiros traballan estes días para garantir o abastecemento durante o estado de alarma, polo que teñen "moitas dificultades" para a declaración de impostos. De feito, sinala que moitas xestorías están "pechadas" ou "excedidas".

Ademais, Medio Rural solicitou ao Goberno unha liña específica de axudas para o sector primario ante o esforzo realizado por agricultores e gandeiros durante o estado de alarma. Así, o conselleiro mostrou as súas dúbidas sobre se os préstamos do ICO poden chegar con "normalidade" ao agro. Tamén require actuacións concretas para subsectores como os da planta ornamental, o viño ou o cárnico. 

REACTIVACIÓN ECONÓMICA NA CORUÑA

O presidente da Deputación da Coruña, Valentín González Formoso, remitiu unha carta ao presidente da Xunta, Alberto Núñez Feijoo, solicitando a creación dun grupo de traballo entre distintas administracións para coordinar "plans, recursos e medidas" de cara á reactivación económica en Galicia tras o fin da crise sanitaria.

En concreto, segundo informa a institución provincial, expón que no citado grupo de traballo estea representada a administración estatal e autonómica, xunto coas catro deputacións galegas e a Federación Galega de Municipios e Provincias (Fegamp).

"Para coordinar todos os plans, recursos e medidas das administracións no ámbito do emprego e o apoio a pemes e autónomos para que estas podan chegar ao máximo número de cidadáns". "Unha vez que superemos esta crise sanitaria, vai ser fundamental para a recuperación económica de Galicia que coordinemos as accións de todas as administracións para remar xuntos na mesma dirección, evitar solapamientos e duplicidades e tentar optimizar a eficacia dos recursos públicos", afirma.

Por outra banda, avanza que a Deputación da Coruña traballa xa nun plan de reactivación económica da provincia. No entanto, no seu escrito, considera que sería necesario "facelo de forma conxunta e coordinada para cubrir todas as necesidades e non deixar a ninguén atrás".

ALU IBÉRICA RETOMA A ACTIVIDADE

Alu Ibérica, como se rebautizou as antigas plantas de Alcoa na Coruña e Avilés tras a súa compra por Parter Capital, retomará este venres a actividade para volver operar con normalidade, informou a compañía.

Nun comunicado, o fabricante metalúrxico propiedade do investidor suízo Parter Capital Group indicou que adoptou esta decisión tras senllas reunións cos comités de empresa das súas dúas plantas da Coruña e Avilés. Así, tanto a fábrica asturiana como a galega reiniciarán a produción de aluminio este venres, día 10 de abril, ás 06,00 horas, "seguindo un estrito protocolo de prevención e minimizando o número de persoal nas fábricas".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta