A familia de Couso apraza a súa concentración anual ante a embaixada de EE.UU por primeira vez en 17 anos
"Parece que foi onte cando o carro de combate disparaba contra o hotel Palestine de Bagdad", di a familia.
Por E.P. | MADRID | 08/04/2020 | Actualizada ás 18:23
A familia do xornalista José Couso aprazou a concentración anual ante a embaixada de Estados Unidos que celebran cada 8 de abril desde hai 17 anos para reclamar "xustiza" e mostrar o seu "rexeitamento ante o país que lexitima a impunidade dos seus militares ao longo e ancho do mundo". A pesar desta decisión, que se tomou como consecuencia da crise sanitaria que vive o país, os familiares de Couso pediron a aqueles que os apoian que non abandonen a "loita".
"Este 2020, por causas de forza maior que todos coñecemos, vémonos na obrigación de aprazar a concentración fronte á embaixada norteamericana en Madrid. Dicimos aprazar e non anular porque seguiremos na loita e non abandonaremos a posibilidade de vernos e abrazarnos e gritar como cada 8 de abril noutro lugar e noutro momento. Pero atoparémonos, non teñades dúbida", escribiu a familia do xornalista nun comunicado.
No texto, lembran que é a primeira vez en 17 anos que este acto non terá lugar e tamén que, a pesar dos anos transcorridos, parécelles " que foi onte" cando o carro de combate "disparaba contra o hotel Palestine de Bagdad", cando "Interpol se negaba a cursar unha orde internacional contra militares norteamericanos, "cando José María Aznar lamentaba e non condenaba" ou "cando ministros do partido socialista recibían ordes" para "pechar o caso Couso".
Do mesmo xeito, destacan que parece que "foi onte cando o goberno do PSOE e UP dicía que estaba coa familia Couso e recorría a sentenza da Audiencia Nacional que ratificaba o esquecemento" á familia e que ordenaba ao Estado a indemnizar con 182.000 euros á súa muller e aos seus dous fillos".
