O servizo de prevención de incendios realiza máis de mil desinfeccións no rural

Os profesionais do Servizo de prevención e defensa contra vos incendios forestais (SPDCIF) da Xunta realizaron máis dun milleiro de desinfeccións en centros de saúde e residencias de maiores e discapacitados desde que empezou a súa colaboración con motivo da pandemia do coronavirus.

Estas actuacións, que realizan os traballadores de forma totalmente voluntaria, leváronse a cabo en ata 200 municipios galegos durante a situación de emerxencia sanitaria, segundo destacou a Consellería do Medio Rural nun comunicado. Ademais dos centros asistenciais, estes traballadores desinfectan outras áreas do rural especialmente concorridas, como beirarrúas ou zonas establecidas para a recollida do lixo.

Nestas tres semanas, conforme apuntou a consellería, actuaron nos exteriores dun total de 232 centros de saúde e 147 residencias de maiores e persoas con discapacidade, situadas en concellos de menos de 5.000 habitantes.

En canto ás desinfeccións, realizáronse un total de 1.159 nestas tres semanas de traballo, das cales 234 foron en centros asistenciais da provincia da Coruña, 256 en centros de Lugo, 513 en Ourense e 156 en Pontevedra.

PRORROGADA A VEXENCIA DOS TÍTULOS DE FAMILIA NUMEROSA

A Consellería de Política Social prorrogou a vixencia dos títulos de familia numerosa, os carnés familiares e os certificados de familia monoparental expedidos en Galicia ata a finalización das medidas extraordinarias do estado de alarma.

En concreto, non será necesario que se renoven aqueles que caduquen entre o 1 de xaneiro de 2020 e tres meses despois do levantamento das medidas derivadas da declaración do estado de alarma. Unha vez finalizado este tempo e cando se reabran os servizos administrativos non esenciais, os titulares destes están obrigados a solicitar a súa renovación.

Así mesmo, no caso das familias numerosas, a prórroga non será de aplicación no caso de que os fillos deixen de cumprir os requisitos para formar parte dunha familia numerosa --ser maior de 26 anos e non ter un grao de discapacidade igual ou superior ao 33 porciento--.

QUEDA NA CASA ESTA SEMANA SANTA

A Policía Nacional lembra á cidadanía que, aínda que se vaia iniciar a Semana Santa, "débense de cumprir as medidas establecidas na normativa pola que se declara o estado de alarma para a xestión da crise sanitaria".

Nun comunicado, incide en que, de acordo ás citadas medidas, durante a vixencia do estado de alarma, as persoas unicamente poderán circular polas vías ou espazos de uso público para a realización dunha serie de actividades "moi concretas, entre as que non se atopan os traslados a unha segunda residencia", insiste. Ademais, lembra a obrigatoriedade de permanecer na residencia habitual.

Respecto diso, sinala que as Forzas e Corpos de seguridade "velarán na rúa para que este tipo de desprazamentos non leven a cabo" e propondo para sanción no caso de que se constaten desprazamentos non autorizados.

SÁBADO SANTO SEN XORNAIS

A prensa en papel volverá ser a gran ausente nos quioscos de todo o estado este Sábado Santo 11 de abril, xa que os xornais non estarán á venda nestes establecementos, por segunda vez, este ano. Os quioscos están autorizados a vender publicacións periódicas durante o estado de alarma decretado polo Goberno para conter a pandemia do coronavirus ao ser considerado un "servizo esencial". O motivo é un descanso establecido pola Lei de Prensa do século pasado e que supón a segunda ocasión no ano en que se dá esta situación --ademais do 1 de xaneiro (Ano Novo) e o 25 de decembro (Nadal)--.

BAIXA UN CHISCO O CONSUMO DE TELE

En canto ao consumo televisivo dos galegos, este mércores 8 de abril situouse nunha media de 280 minutos por persoa/día, o que supón 15 menos que o mesmo día da semana anterior. Trátase do primeiro día desde que se decretou o Estado de Alarma no que o consumo de televisión baixou dos 300 minutos.