Por Europa Press / Redacción | SANTIAGO DE COMPOSTELA | 09/04/2020 | Actualizada ás 13:29
A confirmación de oito novos falecidos en hospitais galegos nas últimas horas eleva as cifras de mortos en Galicia ata os 305 casos, entre estes centros sanitarios e residencias de maiores. A xornada do xoves saldouse cun total de 17 falecidos a causa do coronavirus, dos que trece foron persoas ingresadas en centros hospitalarios.
Estes oito novos casos foron o dun home de 88 anos e dúas mulleres de 58 e 97 anos, respectivamente, que estaban ingresados no Complexo Hospitalario da Coruña; outro home de 90 anos na Rosaleda e outro de 84 no CHUS, ambos en Santiago de Compostela. O resto de falecidos foron unha muller de 95 anos ingresada no Hospital de Valdeorras; e outra de 92 anos, xunto a un home de 92, ingresados no CHUO. Todos eles presentaban patoloxías previas.
Estes oito novos casos súmanse a outros cinco rexistrados esta xornada, en concreto o dunha muller de 89 anos e un home de 84 que estaban ingresados no Hospital de Valdeorras; un home de 92 anos e unha muller de 62 no CHUVI, e outro home de 82 anos no Complexo Hospitalario de Santiago.
TENDENCIA Á REDUCIÓN
O cómputo de falecidos en hospitais sitúase así en 244. Cos últimos datos engadidos, o cómputo por áreas sanitarias ascende a 70 na Coruña, 51 na de Vigo, 47 en Ourense, 32 en Santiago, 16 en Ferrol, 17 en Lugo e 11 falecidos na de Pontevedra.
A evolución de casos na comunidade galega mantense, así, na tendencia das últimas xornadas, pero reducíndose respecto deste mércores con tres casos menos. O titular de Sanidade, Jesús Vázquez, destacaba este xoves que as cifras están "a mellorar" tras as últimas semanas, cun crecemento que se sitúa no 3 por cento diario. Almuíña defende que os casos que aparecen "son, en xeral, leves" e que se tratan no propio domicilio con seguimento desde Atención Primaria, para comprobar se existe un empeoramento dos síntomas, mentres o número de ingresos en UCI "vai baixando día a día".
"É un dato moi importante e moi esperanzador", insistiu, sobre todo de cara a ese futuro levantamento das medidas de confinamento social polo estado de alarma.
RESIDENCIAS DE MAIORES
Ademais, outras catro persoas faleceron en centros residenciais a causa do coronavirus. O computo ascende xa a 61 vítimas nestas instalacións. En concreto, dous na residencia DomusVi de Cangas, un na DomusVi Barreiro e outro na residencia Moledo, estas dúas últimas en Vigo, segundo indica Sanidade.
Así, desde que se iniciou a alerta pola pandemia, morreron 16 maiores no centro DomusVi de San Lázaro, 13 no DomusVi de Cangas, outros 11 na residencia A nosa Señora da Esperanza, 8 na DomusVi do barrio vigués de Barreiro, un na residencia Moledo (Vigo), 6 no Portazgo (A Coruña), un no Fogar Bellolar, outro na residencia de Castro Caldelas, un máis en Remanso Claudina-Somoza (A Coruña), un en San Carlos de Celanova, outro na residencia Divino Maestro (Ourense) e un na residencia de Bande.
Segundo os datos trasladados por Sanidade, do total de 305 falecidos pola pandemia, polo menos 117 son mortes vinculadas con centros residenciais. É dicir, se 61 faleceron nas propias residencias, outras 56 persoas usuarias destes centros fixérono en hospitais ou nas chamadas residencias integradas.
INFECTADOS POR COVID-19
O número de infectados por COVID-19 ascendeu a 5.551 na comunidade galega, tras rexistrarse 91 casos novos. A pesar diso, as altas de pacientes tamén se incrementaron e xa ascenden a 910. Segundo os datos facilitados pola Consellería de Sanidade, 1.148 destes pacientes pertencen á área da Coruña, 563 á de Lugo, 1.041 á de Ourense, 470 á de Pontevedra, 1.069 á de Vigo, 939 en Santiago, e 321 á de Ferrol.
Uns 154 destes pacientes permanecen ingresados na UCI, catro menos que este mércores, mentres que outros 794 atópanse en unidades de hospitalización e 4.603 no seu domicilio. O número de altas tamén aumentou respecto da pasada xornada, con 110 máis que este mércores. En total, este indicador situouse en 910. O test de coronavirus realizados en Galicia (PCR) ascenden a 36.799 ata a data, segundo os datos facilitados por Sanidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.