Por Europa Press / Redacción | SANTIAGO DE COMPOSTELA | 12/04/2020 | Actualizada ás 17:24
O presidente da Xunta, Alberto Núñez Feijóo, acatou a estratexia posta en marcha polo líder do seu partido, Pablo Casado, e considera que os pactos de reconstrución do Estado fronte a cirse do coronavirus que propón o presidente do Goberno, Pedro Sánchez, "é moi bonito dicilo" pero falta "concretar" a vontade deste acordo. "Só coñecemos o título e descoñecemos a letra e a música", dixo.
Na comparecencia tras a videoconferencia deste domingo co resto de líderes autonómicos e Sánchez, Feijóo criticou que "lamentablemente" na xestión da crise sanitaria "anúncianse cousas que nin sequera están traballadas". Referiase á proposta do presidente do Goberno estatal que reclamou a todos os partidos e presidentes autonómicos "unha desescalada da tensión política", pondo como exemplo os consensos da Transición, e apelou á unidade coas autonomías.
"O que si coñecemos é que os grupos parlamentarios socios do Goberno no Congreso dos Deputados dixeron que hai que pactar con Cataluña e con Euskadi", engadiu, en referencia aos partidos independentistas. Neste contexto, advertiu que estas formacións, "no canto de querer os Pactos da Moncloa, o que queren son os Pactos anti-Moncloa", e dixo que así é "moi difícil tomarse as cousas en serio". Unhas críticas aos partidos independentistas que comparte o propio PP que descualifica a Sánchez por esta oferta de diaólgo.
"DESCUALIFICACIÓNS" A DÍAZ AYUSO
Ademais, Feijóo saíu en defensa da presidenta da Comunidade de Madrid, Isabel Díaz Ayuso, e cargou contra o PSOE polas súas "descualificacións" cara a ela e a súa actuación "indigna" na sesión do Congreso desta semana.
"É moi difícil entender que se hai que ser leal con aquel que é desleal e é moi difícil establecer unha fórmula, mesmo de Pactos da Moncloa" neste contexto, aseverou, para logo lembrar que Madrid sufriu a pandemia do coronavirus "con máis intensidade probablemente que calquera outra capital europea".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.