Que pasou cos 8 millóns de máscaras, os 174 respiradores de China e o test rápidos que anunciou Feijóo?
O presidente galego di que só recibiu "entre dez e doce" respiradores, "pero que agora xa non fan falla". Segue "tentando mercar" test rápidos e utilizará aos do goberno para facer estudos epidemiolóxicos.
- Feijóo, tras doar material a Madrid, recoñece que necesitará camas UCI e respiradores para o pico de abril
- Feijóo recoñece que ten 500.000 máscaras en depósito a pesar da falta de material que denuncian os sanitarios
Por Europa Press / Redacción | SANTIAGO DE COMPOSTELA | 12/04/2020 | Actualizada ás 21:20
Hai tres semanas, o presidente da Xunta anunciaba que adquirira material propio para facer fronte á pandemia do coronavirus, entre eles, oito millóns de máscaras, ademais de batas, luvas e traxes protectores. Pouco depois anunciaba a adquisición dunha partida de 174 respiradores a China e 60.000 test rápidos.
Vinte días despois, os oito millóns de máscaras quedaron en 7,3 millóns e dos test rápidos, "diferentes aos do Goberno central", dixo que "existen no mercado e a Xunta está a tentar compralos", manifestou. Dos famosos respiradores, tan necesarios hai unha semana, aclarou que recibiron "aproximadamente 10 ou 12" pero matizou que agora "non é o problema que era hai días". "Agora, e con cautela por se se produce un rebrote da pandemia, neste momento hai capacidade en coidados intensivos", manifestou.
Durante a rolda de prensa mantida con Sánchez este domingo, Feijóo agradedeu que se mande material per explicou que os equipos de protección sanitarios entregados polo Estado á Comunidade son, de acordo coas súas cifras, o 11 por cento dos utilizados en total no Servizo Galego de Saúde (Sergas) --a semana pasada era do 10 por cento--. "Galicia tivo que adquirir o 89 por cento restante", valorou.
Preguntado respecto diso, indicou que a Xunta xa comprou e entregou máis de 7,3 millóns de máscaras, mentres que as do Goberno alcanzan as 924.000 unidades. Desde a Delegación do Goberno informaron a Galicia Confidencial que as máscaras remitidas son 1.470.000 que se suman as máis de 600.000 que se distribuirán este luns. En total, máis de dous millóns, un millón máis das contas da Xunta.
TEST RÁPIDOS
Ao fío de todo iso, Feijóo insistiu en que os case 120.000 test rápidos remitidos polo Goberno central non serven para facer diagnósticos, senón só para estudos epidemiolóxicos. Así, pediu que os test rápidos do coronavirus que adquira o Goberno sexan concluíntes, porque os enviados ata agora "non garanten nin os positivos nin os negativos", xa que teñen que ser complacentrementados "cunha PCR".
E a pesar de que "son bos" para estudos epidemiolóxicos, apelou a que o Estado adquira probas definitivas "polo menos para os positivos": "Existen, están no mercado e a Comunidade galega está a tentar compralos". Con todo, recoñeceu que a metade dos remitidos foron utilizadas para as probas a persoal sanitario e centros da terceira idade, complementados con probas PCR. O resto dixo, serán utilizados para estudos de poboación.
