Por Europa Press / Redacción | SANTIAGO DE COMPOSTELA | 16/04/2020 | Actualizada ás 21:19
A Federación Galega de Municipios e Provincias (Fegamp) emitiu unha circular ás entidades locais para advertir da "dubidosa legalidade" de chamadas de venda de probas de coronavirus que están a recibir alcaldes.
Na súa comunicación, a Fegamp alerta tamén das posibles consecuencias de facer probas diagnósticas da COVID-19 fóra da canle oficial. A Fegamp decidiu enviar este aviso tras ser alertada por varios alcaldes de que recibiran ofertas para adquirir test. Respecto diso, lembra que estas probas deben pasar a supervisión das autoridades sanitarias para que garantan a súa efectividade e seguridade.
"A situación de emerxencia sanitaria que estamos vivindo fai que xurdan tentativas de negocio fraudulentas ou de dubidosa legalidade", sinala a federación, que tamén subliña que a realización de probas diagnósticas excede as competencias municipais e podería ter un efecto negativo nos esforzos por conter a pandemia "ao dar unha radiografía errónea da situación epidemiolóxica e xerar falsas expectativas".
Por iso, a Fegamp fai un chamamento á prudencia e responsabilidade para que, ante a dúbida, cidadanía e entidades sigan as canles oficiais e lembra que os test feitos fóra do sistema sanitario "non teñen validez a ningún efecto".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.