Por Europa Press / Redacción | SANTIAGO DE COMPOSTELA | 18/04/2020 | Actualizada ás 20:15
O presidente do Clúster Turismo de Galicia, Cesáreo Pardal, non dá por perdida a tempada alta nin o ano e tacha de "irresponsabilidade maiúscula" as declaracións nas que a ministra de Traballo, Yolanda Díaz, vaticina que a hostalaría podería non reactivarse ata finais de 2020 debido á crise sanitaria.
Pardal advirte de que "a situación é suficientemente crítica" para o sector, polo que rexeita unhas palabras "fóra de lugar" que contribúen "a xerar confusión e nerviosismo".
Tras cifrar que unhas 120.000 persoas en Galicia traballan neste ámbito, o presidente do Clúster di "subscribir totalmente" as afirmacións da Mesa do Turismo estatal, que considera que as declaracións da ministra son unha "temeridade".
"É un absoluto despropósito e un golpe gratuíto ao sector turístico", valora Cesáreo Pardal, quen tamén avisa que para unha inmensa maioría das empresas manterse pechadas ata fin de ano abocaríaos "a non volver levantar a persiana".
Aínda que considera que debe estudarse "con moito coidado" o calendario da desescalada e "priorizar" o control sanitario, Pardal insta os políticos a non "falar por falar".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.