Temas: AS PONTES ENDESA CORONAVIRUS BNG CIUDADANOS

Ciudadanos pide alternativas ao peche de Endesa nas Pontes: "Moitas familias van perder o seu traballo"

O BNG pide cambios no Real Decreto para que se podan retomar contratos coas administracións.

Por E.P. | SANTIAGO DE COMPOSTELA | 20/04/2020 | Actualizada ás 20:55

A portavoz de Ciudadanos Galicia, Beatriz Piñeiro, di que o Goberno central "ten que buscar unha alternativa para evitar o peche" da planta de Endesa nas Pontes, tras o acordo asinado o pasado venres pola vicepresidenta para a Transición Ecológica, Teresa Ribera, e a ministra de Trabajo, Yolanda Díaz.

A través dun comunicado, a dirixente do partido laranxa critica a Díaz porque "por unha banda di estar a frear os despedimentos de traballadores" no actual contexto de crise do coronavirus, pero "a realidade é que está a acelerar" o peche da planta das Pontes.

"Yolanda Díaz acaba de demostrar que non está cos galegos. Moitas familias van perder o seu traballo", asevera Piñeiro. Neste sentido, a portavoz de Cs en Galicia sinala como "fundamental" aumentar o diñeiro destinado a mecanismos de compensación por emisións de gases contaminantes e subliña que "hai que baixar o prezo da enerxía a estas empresas para que as fábricas sexan rendibles".

Por todo iso, e tras lembrar que Ciudadanos "sempre defendeu" unha lei de cambio climático que responde os obxectivos de sustentabilidade ambiental, Beatriz Piñeiro asegura que se a planta de Endesa pecha "será pola inoperancia durante anos dos gobernos do PP e o PSOE, e agora pola incompetencia e hipocrisía de Podemos".

O BNG PIDE RETOMAR A TRAMITACIÓN DE CONTRATOS CON ADMINISTRACIÓNS

O BNG pediu ao Goberno que cambie o Real Decreto no que se aprobou o estado de alarma como consecuencia da COVID-19 para que se retome a tramitación dos contratos que dependen das administracións públicas.

Nun comunicado remitido aos medios, o BNG sinala que como consecuencia da declaración do estado de alarma, os prazos na tramitación dos contratos do sector público quedaron paralizados, cuestión que para o BNG supuxo un "erro". Segundo indica o Bloque, quedaban en excepción os contratos administrativos que tivesen relación directa coas necesidades derivadas da pandemia pero o resto de tramitacións quedaron conxeladas.

Para os nacionalistas esta paralización tradúcese nun atraso de traballo que xa estaría preparado para executar no momento no que se levantase o confinamento e puidésese reiniciar a actividade económica. "Agora, cando a fin do confinamento se ve máis próxima, sería necesario que a xestión administrativa se normalice e así garantir que, no momento no que a actividade económica poida poñerse outra vez en funcionamento, os trámites estean finalizados", sinala a formación.

O Bloque sinala que estas cuestións non supoñen un risco para a saúde posto tanto as empresas como o funcionarios poden facelo mediante teletraballo e a través das sedes electrónicas das diferentes administracións.

Temas: AS PONTES ENDESA CORONAVIRUS BNG CIUDADANOS