Por Europa Press / Redacción | SANTIAGO DE COMPOSTELA | 21/04/2020 | Actualizada ás 15:38
O secretario xeral do PSdeG, Gonzalo Caballero, lamentou este martes que a Xunta "non estea a dar respostas nin solucionando os problemas" que existen no ámbito escolar como consecuencia da crise do coronavirus, tanto no que respecta ao peche do curso académico como no relativo á convocatoria das oposicións para o corpo docente.
No que incumbe ao curso escolar, o líder dos socialistas galegos criticou que Feijóo diga que "non lle convence" o acordo asinado entre o Ministerio de Educación e as comunidades autónomas "sen trasladar cal é a súa posición". "É necesario que clarifique a súa postura e que aclare se é partidario de obrigar aos nenos a acudir ás aulas antes do verán", remarcou Gonzalo Caballero, consciente dos problemas que poden xurdir como consecuencia da celebración de clases presenciais.
En paralelo, o máximo dirixente do PSdeG lembrou que xa propuxo á Xunta que dispoña de "máis medios e máis facilidades de conexión" para que os alumnos poidan acceder aos materiais e actividades de forma virtual.
OFERTA DE EMPREGO PÚBLICO
En canto á oferta de emprego público para docencia, Gonzalo Caballero expresou a súa preocupación pola actitude que está a ter Feijóo ao "non despexar o calendario".
"Parece que prefire botar un órdago aos opositores e seguir sen posición nas pavías da confusión", reprobou e pediu acordar "unha solución á problemática do calendario" que "dea certezas" a quen leva moitos meses preparando oposicións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.