Cazoladas para que os nenos poidan dar "paseos curtos" na rúa

A iniciativa, a nivel estatal, deixouse sentir en distintas zonas de Galicia.

Por E.P. | Santiago de Compostela | 21/04/2020 | Actualizada ás 19:47

Comparte esta noticia

Cidadáns de distintos barrios españois protestaron este martes cunha cazolada ás 19,00 horas para pedir ao Goberno que permita aos pais dar "paseos curtos" cos nenos tras máis dun mes de confinamento en casa polo coronavirus.

A iniciativa, que se deixou sentir en distintas zonas de Galicia, convocouse a través das redes sociais e cadeas de mensaxes en WhatsApp, na que se emprazaba aos cidadáns a saír aos balcóns para protestar pola medida do Executivo que só permite aos nenos menores de 14 anos saír á rúa a partir do luns 27 de abril acompañado dun adulto para realizar algunha das actividades permitidas polo Real Decreto do Estado de Alarma, como ir ao supermercado, á farmacia, ao banco, a comprar o pan ou o xornal.

Un neno cunha máscara asómase á xanela da súa casa durante o confinamento polo coronavirus
Un neno cunha máscara asómase á xanela da súa casa durante o confinamento polo coronavirus | Fonte: Óscar J.Barroso - Europa Press.

A convocatoria da cazolada propuña manifestarse desde os balcóns e xanelas ás 19,00 horas "ante as ridículas e absurdas medida de alivio anunciadas polo Goberno para a infancia". "Os nenos levan cinco semanas encerrados (seis nalgunhas comunidades) e as medidas anunciadas non só non supoñen ningún alivio para eles, senón que aumentan o risco de contaxio", explicaba a mensaxe distribuída.

Neste sentido, os promotores piden ao Executivo central que se permita aos nenos "dar paseos curtos de forma controlada e ocasional", acompañados por un adulto e "mantendo a distancia" establecida polas autoridades sanitarias. "Os nenos teñen necesidades físicas e psicolóxicas que cremos que non se están tendo en conta", denunciaba a publicación.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta