A UDC terminará o curso de forma non presencial e fixa os exames entre maio e xullo
Débese realizar unha avaliación continua das materias de modo virtual e non poderán ser obxecto de avaliación os contidos que non fosen impartidos.
Por Europa Press / Redacción | A CORUÑA | 22/04/2020 | Actualizada ás 20:38
O Consello de Goberno da Universidade da Coruña (UDC) acordou terminar o curso de forma non presencial e fixou a data dos exames para os meses de maio e xullo, segundo informa o reitorado coruñés.
Nunha reunión celebrada de forma telemática, aprobou as 'Medidas para a finalización do curso académico 2019-2020 e para asegurar a calidade docente ante a situación excepcional provocada pola COVID-19', elaboradas despois de consultas con estudantes, decanos e directores de centros.
"Ante a incerteza de non saber cando se poderá retornar ás aulas", tomou a decisión de terminar o curso de forma non presencial. No documento aprobado, especifícanse instrucións de reprogramación da actividade docente, a obrigatoriedade de impartir docencia e a avaliación do alumnado de forma non presencial, facendo selección dos contidos fundamentais. Os centros e departamentos deben potenciar os mecanismos de coordinación.
EXAMES
Mentres o calendario de avaliación será para a primeira oportunidade do segundo cuadrimestre, entre o 18 de maio e o 19 de xuño. A segunda oportunidade do primeiro e do segundo cuadrimestre será do 29 de xuño ata o 24 de xullo. Cada centro fixará as datas de celebración das probas finais non presenciais de cada oportunidade deste segundo cuadrimestre antes do 5 de maio, e da segunda oportunidade do primeiro e segundo cuadrimestre, antes do 15 de maio.
Os centros poden programar a defensa do Traballo de Fin de Grao e Traballo de Fin de Máster ao longo de todo o período académico, e ademais unha defensa na segunda quincena de setembro, podendo solicitarse a ampliación de prazo. No que respecta á defensa das teses de doutoramento farase exclusivamente por vía telemática.
Como norma xeral, débese realizar unha avaliación continua das materias de modo virtual e non poderán ser obxecto de avaliación os contidos que non fosen impartidos en modalidade presencial ou non presencial ou que precisen de materiais, recursos ou bibliografía que non estean accesibles para todo o alumnado.
