Bares e restaurantes "ao bordo do abismo"... Cando e como volveremos aos de toda a vida?
Cunha proxección de futuro difícil de xestionar, bares, restaurantes e hoteis buscan xa as medidas máis adecuadas para garantir a seguridade sanitaria da clientela unha vez que reabran. GC fala coas asociacións de hostalaría de tres cidades galegas para saber como esperan esa volta.
Por Uxía Iglesias | SANTIAGO DE COMPOSTELA | 28/04/2020 | Actualizada ás 14:00
"Incerteza". Esta é a palabra que mellor define o estado xeral do sector da hostalaría, que se mantén pendente de coñecer cal será esa ansiada, ao mesmo tempo que temida, data de reapertura de bares, restaurantes e hoteis. Poucos se animan a aventurar os prazos aínda que manteñen unha "pequena esperanza" de que o sector "non perda o resto de ano" e xa a mediados de xuño poida comezar de novo, con cautela, a actividade dos locais. Agora ben, pensar en cando se recuperarán os niveis pre-crise xa é "xogar a ser adiviño".
De que maneira terá lugar esa volta é outra das incógnitas aínda sen resolver. Pendentes do que digan as autoridades sanitarias, os hoteleiros xa comezaron a barallar cales son as medidas que máis poden adecuarse a cada un dos negocios de cara a garantir a seguridade sanitaria da clientela: fálase de biombos, de distanciamento social, de sistemas de desinfección con ozono, de lámpadas de raios ultravioleta... Pero, máis alá, os bares e restaurantes están preocupados por se todo isto "compensará". "Estamos desexando abrir, pero en canto o fagamos, a sensación é de que imos ter que pechar. As cousas están moi feas e non poderemos soportar os custos", indica o presidente da Federación de Hostelería de Pontevedra, César Sánchez-Ballesteros.
A VOLTA A BARES E RESTAURANTES
O regreso aos bares, restaurantes e hoteis será moi diferente a cando os deixamos, xa hai case dous meses. Esta 'nova normalidade' que nos espera como sociedade logo de superar o punto álxido da pandemia da Covid-19 cómpre deseñala e cimentala. Un dos retos máis importantes do sector pasa por poñer en marcha medidas que eviten o contaxio e que aseguren a "tranquilidade e a confianza" do cliente. Hostelería de España está xa traballando en protocolos para crear certificacións sanitarias a nivel estatal.
Neste sentido, dende a Asociación de Hostalaría de Compostela apostan, nesta "volta escalonada á normalidade", por sistemas de desinfección con ozono para manter a "hixiene ambiental" dos establecementos. "Trataríase de canóns que continuamente emitiran ozono para contrarrestar a posible presenza do virus", indica o seu presidente, Ramón García. Tamén fala deste sistema Sánchez-Ballesteros, que ademais subliña a importancia da redución dos aforos e da implantación doutros métodos como as lámpadas de raios ultravioleta. Sobre a colocación de biombos, Sánchez-Ballesteros considera que "non é o camiño": "Vémolo un gasto innecesario, non cremos que sexa un elemento hixiénico e ademais, dificulta moito servir as mesas". "Temos que asumir outros gastos máis prácticos, estamos traballando coas autoridades sanitarias, que son as que teñen que guiar", engade.
A pesar de todas estas medidas que se barallan, dende a Federación de Hosteleiros de Pontevedra dubidan que se poida garantir ao 100% que non se vaian producir contaxios nos establecementos: "O cliente quita as máscaras e os guantes para comer ou para beber, isto abre un abano de complexidades moi serio", indican. Súmase a isto que "ninguén fixo tests masivos" e "non" se pode asegurar que os traballadores non estean infectados.
Neses bares e restaurantes con terrazas ao aire libre a situación é máis sinxela de solventar. Cumprirá aumentar a distancia entre mesas e formar adecuadamente os camareiros, fala Sánchez-Ballesteros. Cousa ben distinta acontece no interior dos locais. "Como facemos para acceder ao cuarto de baño, por exemplo? Habería que establecer un control para que as persoas non se crucen e limpar eses espazos constantemente". A aplicación das medidas tamén estará moi condicionada pola "grandísima variedade de establecementos hosteleiros" e diversas dimensións.
OS HOTEIS: APERTURA "MÁIS FÁCIL"
Outro mundo diferente é o dos hoteis. Aínda que de primeiras pareza que garantir a seguridade nestes espazos poida convertirse nunha odisea aínda maior ca en bares e restaurantes, o certo é que a súa apertura, quizais, resulte "máis sinxela". Segundo Sánchez-Ballesteros, "nestes establecementos poden levarse a cabo os mesmos mecanismos que hoxe teñen as empresas que xa están abertas: manter distancias, moito uso de xeles, guantes, máscaras..., certa restrición de aforos, desinfeccións estritas de zonas comúns... Deste xeito podemos manter o control; tecnicamente é máis fácil".
ECONOMICAMENTE, "AO BORDO DO ABISMO"
Se ben o desexo de todo o sector é volver abrir e poder, pouco a pouco, adaptarse a esta nova realidade marcada pola Covid-19, a maior preocupación está en que os números non dean e que non haxa maneira de revertilos. "A sensación é de que imos abrir para pechar", contan dende a Asociación Hostaleira de Pontevedra, que definen como "un drama" e "un caos" o estado económico do sector. "Atopámonos ao bordo do abismo". A impresión é a mesma en Ourense. Por parte da súa Federación de Hostaleiros, Ovidio Fernández denuncia que "despois dos miles de millóns que se barallan como perdas, a situación non fixo máis que empeorar". "As mensaxes que nos mandan apelan á tranquilidade, pero iso non responde as preguntas que como sector facemos", sentenza.
Espéranse ocupacións por baixo do 10% e cómpre tamén ter en conta que ao redor do 95% do sector está conformado por pequenas empresas. Perante esta dura situación, o sector esixe "axudas directas". "As empresas acóllense a ERTEs pensando que a volta vai ser plena, pero non será así. Necesitaranse a metade de traballadores dos que antes, porque o negocio non dará para os gastos que xere. Non serán rentables. Non descarto que moitos opten por botar o cerre definitivo, paréceme un escenario perfectamente posible", sinala Ramón García, da Asociación de Hostalaría de Compostela.
"Os cambios están chegando mal, tarde ou non se executan", denuncia agora Sánchez-Ballesteros, que especifica que a nivel bancario, os Fondos ICO aínda non se fixeron efectivos. Tampouco convencen as medidas impulsadas polo Goberno estatal respecto dos alugueres. "O sector demanda que durante o período de cerre haxa unha normativa que reduza ao 50% o aluguer dos establecementos. A norma que saíu este xoves só serve para dar un titular, pero realmente, non nos alivia. Sae beneficiado o 1% do sector". Segundo Sánchez-Ballesteros urxe tamén modificar a lei de ERTEs "para poder saír adiante".
"As cousas están moi feas". Nisto concordan todos. Mais no medio do caos cómpre "buscar a maneira de que a xente volva aos locais" e que o faga "en condicións de absoluta seguridade, con tranquilidade e confianza, e sen preocupación polo contaxio", indica Ramón García. "Esa é a esencia". E nela traballan. Para adaptarse ás necesidades dos novos tempos.
