Por Europa Press / Redacción | SANTIAGO DE COMPOSTELA | 24/04/2020 | Actualizada ás 16:06
O alcalde de Pontevedra, Miguel Anxo Fernández Lores, do BNG, indicou que é "imprudente" suspender agora as festas de verán na cidade, que inclúen a Semana Grande da Peregrina e a Feira Franca. "Parece evidente que as grandes aglomeracións van estar prohibidas por algún tempo, pero a min non me gusta adiantarme na toma de decisións", sinalou o rexedor, nunha videoconferencia cos medios de comunicación.
Lores resístese a tomar decisións "sen argumentos" especialmente cando "non se sabe" canto tempo máis vai durar o estado de alarma e en que condicións se fará o proceso de "desescalada". Por este motivo, o rexedor apuntou que o goberno local actuará "a medida que se acheguen esas datas", sendo consciente da relevancia que teñen as festas e os grandes eventos, unhas actividades que xeran un impacto económico moi importante na cidade.
Neste sentido, o alcalde de Pontevedra anticipa que, chegado o caso, se hai que decretar a suspensión de eventos, tratará de buscar fórmulas para salvar algúns contratos. Expertos apuntan que durante o verán aumentará a circulación do virus pola concentración de xente.
PASEOS DOS NENOS
Fernández Lores tamén se referiu, a preguntas dos xornalistas, á saída dos nenos menores de 14 anos a partir do domingo, apelando á "responsabilidade" dos pais para que asuman eses paseos mantendo o "excepcional" comportamento que están a demostrar durante este estado de alarma.
Esta circunstancia, segundo o alcalde de Pontevedra, está relacionada "indubidablemente" no feito de que esta área sanitaria ten o menor índice de afectados e de falecementos en Galicia.
TAXAS E IMPOSTOS
Por outra banda, o alcalde de Pontevedra anunciou que, mentres dure a actual situación de estado de alarma, ningún cidadán deberá abonar impostos municipais, taxas ou prezos públicos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.