A Xunta descarta máis risco de incendios polo atraso en rozas: "A causa última é a man do home"

A Consellería de Medio Rural descarta que haxa máis risco de incendios este ano en Galicia polo atraso nas tarefas de roza nas franxas secundarias --nos 50 metros ao redor de vivendas--, tras ampliarse dous meses o prazo para realizar limpezas debido ao estado de alarma polo impacto do coronavirus. Agora o límite para estas tarefas será o 31 de xullo no canto do 31 de maio.

"A causa última dos lumes é a man do home, non a situación na que se atope o monte nun momento determinado", asegura a Consellería de Medio Rural a Europa Press.

Aínda que recoñece que unha biomasa ben xestionada "axuda a frear a propagación do incendios", deixa claro que "o risco de que se produzan lumes non se incrementa necesariamente polo estado da biomasa, senón polo factor humano". Fai fincapé en que se comprobou "en repetidas ocasións que cando se dan as circunstancias proclives para a actividade incendiaria (como vento forte, calor e baixa humidade), esta dispárase".

O pasado sábado, a Xunta acordou no Centro de Coordinación Operativa (Cecop) --onde tamén participan a Delegación do Goberno e a Federación Galega de Municipios e Provincias (Fegamp)-- levantar a suspensión do prazo legal para cumprir co deber de execución da xestión da biomasa nas franxas secundarias, que estaba fixado para o 31 de maio. Agora haberá dous meses máis correspondentes aos días transcorridos durante o estado de alarma.

Máis aló desta ampliación, Medio Rural remarca que as empresas forestais "poden traballar con normalidade", polo que "calquera particular lles pode encargar estes labores". "É algo que non se está vendo condicionado", asegura. Así mesmo, apunta que os convenios cos concellos están activos e en vigor, cun "nivel de esforzo en materia de prevención e extinción idéntico aos dous últimos anos".

"AMBICIOSO" PROGRAMA DE PREVENCIÓN

Mentres, persoal da empresa pública de Seaga executa actuacións de limpeza en parcelas contratadas por propietarios nas parroquias de alto risco de incendios, en función do convenio asinado con Xunta e Federación Galega de Municipios e Provincias (Fegamp), "ao ser a prevención unha actividade considerada esencial".

Respecto diso, a Consellería de Medio Rural avanza que se traballa "nun ambicioso programa de prevención" que se executará integramente "axiña que o permita a emerxencia sanitaria", aínda que "moitas" das liñas de actuación están en marcha.

O ESTADO DE ALARMA NON TEN IMPACTO RESEÑABLE EN INCENDIOS

Durante o confinamento, entre finais de marzo e comezos de abril rexistráronse varios incendios na provincia de Ourense, entre eles algúns provenientes de Portugal como os que afectaron o parque natural do Xurés. Medio Rural subliña que "a actividade delictuosa incendiaria é independente da situación de emerxencia sanitaria", polo que "esta casuística non varía polo coronavirus".

ULTIMA O NOVO PLADIGA

Así mesmo, a Xunta está "a ultimar" as actualizacións do plan de loita contra o lume (Pladiga) para este ano. O alto risco arrincará, como é habitual, o 1 de xullo, cando se despregará a maior parte. Prevese un operativo e un orzamento "semellantes" a outros anos.

Con todo, a pandemia obrigou a adoptar unha serie de protocolos para garantir que os traballadores do dispositivo poidan actuar con seguridade na protección fronte ao virus. Actualmente, traballa sobre o territorio "con total normalidade" o persoal de nove e 12 meses no marco de época media de risco. A partir de maio comezará a traballar o persoal de seis meses.

Un tractor roza nunha leira en Galicia. CEDIDA - Arquivo | Fonte: Europa Press