Por Moncho Mariño | Santiago de Compostela | 02/05/2020 | Actualizada ás 22:00
As probabilidades dunha recesión económica que afecte tamén ás pensións non é unha idea que se poda desbotar. Así se pode deducir das declaracións ofrecidas por persoas vinculadas ao Movemento pola Defensa das Pensións Dignas. A diferenza coa crise que comezou en 2008, estiman que agora o Goberno fixo unha intervención rápida fronte a unha indecisión e logo un recorte das pensións por parte dos executivos de Zapatero e Rajoy.
Outra cuestión é convencer ao resto da sociedade que coas pensións se poden crear postos de traballo, que un sistema público de residencias non tería que ser un custe adicional para a sociedade. Isto redundaría en beneficio de sectores da sociedade ata o momento moi afectados polas recesións económicas.
OUTRA CRISE?
“Se se produce unha crise agora será por estarmos en casa sen producirmos, se non prestamos servizos, non creamos riqueza” di o economista Xavier Pérez Davila. Sen produción non hai ingresos, non hai consumo e a economía acaba renxendo por todas partes. As solucións que se podan adoptar virían por unha parte da investigación e descubrimento dunha vacina e tamén das políticas públicas que se adopten.
Mais volvendo ás consecuencias para as pensións, o feito de afrontar unha nova recesión agora mesmo “non suporía tocar a hucha das pensións, neste momento deuse unha resposta rápida” di Victoria Portas, experta en Seguridade Social e Relacións Laborais. Esta non é unha situación igual á de 2008. “As pensións de abril collerán o país máis feble, e debemos ter en conta que a recuperación levará tempo".
“Debemos ter en conta que no Goberno do Estado existen posicións a favor de medidas neoliberais e posicións contrarias” di Francisco Vázquez, médico retirado e membro de MODEPEN. Para Vázquez existe un pulso social que acabará segundo o que se poña sobre a mesa. “Non pode darse outra vez o de 2012, volver á tentación de recortes sobre as pensións”.
PENSIÓNS, DIÑEIRO PERDIDO?
A idea máis recorrida sobre o futuro das pensións é a de que o avellentamento da poboación levará a atrasar a idade de xubilación. Isto aplicarase para manter o fluxo monetario que se traducirá logo en pensións. Mais, o avellentamento é tan nocivo para as propias pensións? “De ningunha maneira, se fosemos un país civilizado aproveitaríase esta coxuntura para a creación de máis postos de traballo no sector” di Francisco Vázquez.
“As pensións deben estar dentro dun sistema social máis amplo” di Xavier Pérez Davila. O economista sinala que durante a crise de 2008, as pensións e subsidios fixeron de freo mantendo unha certa demanda que sen elas sería imposible. “Se en Galicia temos 700.000 pensionistas, temos uns ingresos garantidos para crear demanda”.
Pérez Davila ademais, explica que a creación dun sistema enteiramente público de residencias tería un dobre beneficio para a economía galega. Por unha parte, os usuarios e usuarias estarían atendidos, senón de maneira gratuíta, si cunha aportación mínima. Esta rede de centros en canto emprego, “beneficiaría en canto creación de emprego e redución de persoas dependentes a cargo das familias”.
A Carta Social Europea declara que a pensión mínima digna debería supor polo menos o 60% da renda media dun país. Con todo “a renda non debera baixar do Salario Mínimo Interprofesional” di Pérez Davila. En España, aínda non se derogou o decreto que incrementaba a contía das pensións un 0,25% por ano. Pedro Sánchez anunciara a súa súba segundo o IPC, aínda así, a súa primeira actuación foi unha suba xeral do 1,6% e dun 3% as pensións mínimas. De momento, e coa COVID-19 aínda en activo, as medidas aínda están no aire.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.