Por Europa Press / Redacción | SANTIAGO DE COMPOSTELA | 01/05/2020 | Actualizada ás 11:31
O catedrático de Medicina Preventiva e Saúde Pública da Universidade de Santiago (USC) xubilado, Juan J. Gestal, estima que Galicia terá un 10 por cento de persoas inmunes porque "o virus circulou moi pouco", polo que aposta por "levantar ben" o confinamento decretado pola crise do coronavirus COVID-19 e "non precipitarse".
"Estimo que andaremos en Galicia ao redor do 10%, que é unha porcentaxe moi baixa", comentou, en declaracións a Europa Press, o doutor Gestal preguntado sobre o estudo que elabora o Sergas para coñecer a circulación do virus en Galicia.
Iso, asegurou, "débese a que o virus circulou pouco" polo estado de Alarma decretado polo Goberno central e iso fixo que aquí "se pechara pronto". "Pero se miramos outra comunidade como Madrid, creo que a porcentaxe de inmunes andará ao redor do 15%", manifestou, para aclarar que "non é unha bóla de cristal", senón que o estima "polas informacións de pequenos estudos e o que se viu noutros países".
"Ao pechar pronto, tivemos menos problemas e o sistema sanitario puido atender a todo o mundo moi ben. En comunidades como Madrid ou Cataluña pechouse máis tarde e isto ten un crecemento exponencial moi explosivo, houbo unha tensión terrible no sistema sanitario", lembrou. Por iso, no caso de Galicia, insistiu en que "como se pechou o virus non circulou moito". "Gustaríame equivocarme e que fosen unhas porcentaxes moito maiores, pero témome que non", dixo Gestal.
DESESCALADA
En relación ao proceso de desescalada tras o confinamento decretado a mediados de marzo, Gestal destacou que "todo depende de que agora se termine ben". "Fíxose ben o tema que nos confinamos e agora hai que terminalo ben e levantar ben, non hai que precipitarse e non ir nin moi rápido nin moi amodo; ninguén sabe como hai que facer isto", explicou.
Deste xeito, sinalou que "cada país fai o que considera mellor" porque non existe "unha fórmula". "Debésemos esperar a ter ben controlada a transmisión, a reducir o número de casos, diría ata que non teñamos ningún número de casos autóctonos. E esperar esas dúas semanas do período de incubación", aconsellou porque "é o académico, o que di a medicina preventiva que debe facerse para dicir que iso está controlado".
"É fundamental para detectar o maior número de asintomáticos e facer unha curva con eles e esta aumentaría e comezaría a descender nun momento, ese descenso da curva dos asintomáticos diríanos que estabamos nunha magnífica situación, empezando a controlar a fonte de infección", sentenciou.
USO DE MÁSCARA
Gestal apostou polo "uso de máscara xeneralizado cando se salga de casa" porque "dificulta a transmisión, como o efecto paraugas das vacinas", o que vai axudar a "diminuír o número media de infectados que poida contaxiar e dar unha protección ao conxunto", manifestou.
Ademais, insistiu en que se debe "gardar a distancia de seguridade" e seguir "a etiqueta respiratoria de como se estornuda" e incidir na "a hixiene de mans". Todo iso, abundou, haino que "manter ata ter unha vacina". "E espero que despois queden hábitos saudables favorables", abundou.
"E poida que nalgún momento, se se produce algún rebrote, haxa que facer algún tipo de confinamento parcial ou total. Prefiro esa consecuencia, non como unha proposta de deixar que sexa a nai natureza a que funcione e se produza unha catástrofe sanitaria", afirmou, para sentenciar que "xa se sufriu bastante en toda España".
VERÁN E ELECCIÓNS
Preguntado sobre a época estival e a posible celebración dos comicios autonómicos nela, sinalou que supón "que as eleccións seguramente se celebrarán" aí porque "haberá unha bonanza epidemiolóxica no verán".
Para Gestal "este vai ser un verán atípico totalmente". "vai ser un verán raro". "Non teremos festas, non haberá orquestras e todo o que ten o verán consigo, pero vai ser un verán distinto, moi diferente", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.