O Pazo de Deportes da Deputación de Ourense serviu como centro de apoio para tres mil profesionais

Uns 3.000 profesionais utilizaron nun mes as instalacións do Pazo de Deportes 'Paco Paz' da Deputación de Ourense como centro de apoio a transportistas e persoal esencial na loita contra o COVID-19.

Segundo informou a Deputación, "todos eles valoraron" esta medida de apoio que o goberno provincial puxo en marcha para axudar ao persoal implicado na prestación de servizos esenciais, ofrecéndolles áreas de hixiene, catering e descanso.

O presidente provincial, Manuel Baltar, destacou que o maior recinto deportivo da provincia de Ourense "púxose a disposición dos profesionais do transporte e do persoal implicado na prestación de servizos esenciais", con servizos de hixiene, descanso e catering.

Trátase dunha medida integrada nas iniciativas que desenvolve a Deputación na súa loita contra a pandemia e que ten como obxectivo "ofrecer un lugar destinado á hixiene persoal, así como ao descanso e manutención básica, para estes profesionais que están a dar o mellor en favor da cidadanía no momento máis duro da crise".

Os sectores profesionais que máis utilizaron as instalacións do Paco Paz durante este mes foron a Policía Local (21%), a Garda Civil (14%), sanitarios e persoal de recollida de residuos (12% cada un), Policía Nacional e Protección Civil (11% cada un), transportistas (9%), Policía Autonómica (6%), e medios de comunicación e bombeiros (4%).

O presidente Baltar confirmou que as instalacións continuarán abertas e dispoñibles para esta actividade durante o tempo que dure o estado de alarma, manténdose o horario de 6 da mañá a 11 da noite, ininterrompidamente.

Palacio Deportes Deputación Ourense | Fonte: wikipedia