Por E.P. | SANTIAGO DE COMPOSTELA | 03/05/2020 | Actualizada ás 10:48
Entidades representantes de persoas con discapacidade reclaman garantir o "dereito á saúde" e a "atención sanitaria" deste colectivo con motivo do Día Nacional da Convención da ONU sobre os Dereitos das Persoas con Discapacidade, que se celebra este domingo 3 de maio.
Así, o Comité de Entidades Representantes de Persoas con Discapacidade de Galicia (CERMI Galicia) esixe garantir plenamente "o dereito humano á saúde" de todas as persoas con discapacidade, "sen discriminacións nin excepcións e con enfoque de xénero" e sumar ao manifesto deste ano centrado no dereito á saúde sen discriminacións ante a crise desatada pola pandemia de coronavirus.
O obxectivo da xornada pasa por contribuír ao coñecemento, difusión e toma de conciencia acerca da Convención da ONU sobre os Dereitos das Persoas con Discapacidade e os seus principios, valores e mandatos, estendendo "a cultura e a práctica dos dereitos humanos na esfera das persoas con discapacidade".
O manifesto denuncia "calquera práctica, recomendación ou política clínica que discrimine ás persoas con discapacidade no acceso aos coidados de saúde e nos servizos sanitarios (neste caso tratamentos contra o COVID-19), porque nunca se repetirá bastante que todas as vidas humanas teñen o mesmo valor e dignidade".
Así, o comité advirte da situación das persoas maiores con discapacidade, "que están a sufrir esta pandemia en carne propia de forma máis virulenta e cuxos dereitos humanos se están non só cuestionando, senón negando do modo máis desapiadado, a favor dunha pretendida eficiencia do sistema, ante a escaseza de recursos e a elevada presión asistencial".
Doutra banda, demanda que a perspectiva de xénero presida a xestión desta crise, na que se conte coas mulleres e nenas con discapacidade e que incorporen accións que protexan ás nais e coidadoras, "para que esta emerxencia non repercuta de forma desmedida nelas: pola saúde, pola violencia de xénero e por coidar dos demais".
MEDIDAS DE PROTECCIÓN
No marco de conmemoración deste día, a Federación Galega de Dano Cerebral (Fegadace) presentou 20 medidas para garantir a protección das persoas e familias con esta discapacidade durante o período de crise causado polo coronavirus.
Esta federación lembra que cun escenario de peche temporal das asociacións, servizos de atención diúrna e de rehabilitación das asociacións de dano cerebral, as persoas con discapacidade atópanse nos seus domicilios, cos seus programas de atención e inclusión interrompidos.
Por este motivo preparou unha lista sobre as necesidades detectadas durante o período de confinamento, así como agora que se albisca a "nova normalidade". Algunhas están relacionadas con recoñecer ao colectivo como "de alto risco" pola "complexidade das secuelas que compoñen esta discapacidade".
RECLAMACIÓNS
Tamén buscan "garantir" a rehabilitación física e cognitiva a domicilio, a cesión temporal dos medios técnicos que sexan precisos para a teleasistencia e a atención domiciliaria con todo tipo de servizos de compra, limpeza e apoio.
A nivel hospitalario reclaman medidas que sensibilicen á poboación para acudir aos centros sanitarios se se detecta algún síntoma de ictus ou de calquera outra causa de dano cerebral. Tamén que a reserva de recursos para a atención ás persoas con coronavirus non repercuta na axilización das altas ás que sufran dano cerebral e garántase a súa correcta atención.
Por último, con respecto á reapertura de centros solicitan que se faga en condicións especiais, con EPIs e material desinfección, así como con mecanismos de apoio para non pór en perigo a saúde dos profesionais, persoas con dano cerebral ou as súas familias.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.