Por Europa Press / Redacción | SANTIAGO DE COMPOSTELA | 03/05/2020 | Actualizada ás 22:20
O presidente da Xunta, Alberto Núñez Feijóo, criticou novamente este domingo o plan de desescalada do Goberno central pero, tras preguntarlle este medio, se ademais de criticar, ten un plan específico de desescalada para Galicia, contestou con evasivas: “Se souberamos cando o presentaba -Sánchez- pois xa o teriamos presentado”, dixo.
“Por suposto que temos propostas e xa llas remitimos ao Goberno central, pero non sabiamos que ía presentar o plan este martes. Se o souberamos con antelación pois teriamos un plan compartido entre as autonomías”, dixo.
Así, volveu suliñar que se Galicia puidera actuar con competencias e de forma autónoma ou se puxera fin ao Estado de Alarma, “pois a Xunta presentaría ese plan”. Neste sentido, destacou que a Xunta ten un comité clínico e de expertos que xa fixo propostas: que ese plan sexa por territorios, por distritos e áreas sanitarias e que haxa a posibilidade de moverse entre áreas.
E, pouco máis alá foi Feijóo no seu plan propio, ao aludir que tamén instaron a comercios e perruquerías a abrir con cita anticipada. “Claro que temos protocolos para sectores económicos”, insistiu ante a pregunta deste medio. “E se tiveramos autonomía para facer o plan de desescalada pois teriamos un plan publicado no DOG”, dixo.
CRÍTICAS
Previamente, o presidente galego cualificara de "confuso, incompleto e discrecional" o plan de desescalada exposto polo Estado, do que insistiu en que a división do territorio por provincias atende a un "criterio administrativo" que se remonta a 1833, polo que aínda ve "conveniente" que se faga por áreas sanitarias.
Neste sentido, e aínda que saudou que Sánchez "reabriu" a porta a modificar este criterio se as comunidades ofrecen "razóns suficientes e motivadas", Feijóo lamentou "a ausencia de coñecemento" en canto aos criterios sanitarios que cada territorio debe cumprir para avanzar nas fases do desconfinamiento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.