Por Galicia Confidencial | Santiago de Compostela | 05/05/2020 | Actualizada ás 22:25
Máis da metade da poboación galega non domina ningunha lingua estranxeira e un 15,8% afirma dominar cando menos dúas. Así o recolle “O valor do Portugués en Galicia”, o primeiro grande estudo que analiza o uso, actitudes e ensino do portugués no noso país e que se ofrecen datos da percepción da cidadanía galega sobre o plurilingüismo.
Así, e segundo este informe, canto máis urbano é o contorno e menor é a idade, mellor é a competencia en linguas estranxeiras. O nivel de estudos, a ocupación e o salario son outras variables relacionadas positivamente co plurilingüismo.
Outro dos datos deste estudo elaborado polo Observatorio da Cultura Galega (OCG) é que o portugués está presente entre as capacidades do 73% das persoas plurilingües galegas. Por iso, detecta que “as persoas con competencias altas en galego semellan ter máis facilidade para os idiomas” e tamén que os galegofalantes e “os suxeitos con mellor competencia lingüística en galego teñen mellor competencia en portugués e tamén favorece a competencia en inglés, francés e incluso alemán”.
Polo tanto, segundo este estudo, para quen sabe galego resulta máis fácil aprender idiomas e ser plurilingüe. Ademais, os datos sinalan que as persoas que aprenderon a falar en galego e castelán na infancia teñen maior probabilidade de ser plurilingües de adultos.
Por último, respecto da chamada Lei Paz Andrade (aprobada en 2014 e resultado dunha Iniciativa Lexislativa Popular) o estudo conclúe que as persoas máis novas, os habitantes dos municipios próximos a Portugal e os que amosan unha prevalencia de Galicia no seu sentimento nacional son os que mellor a coñecen.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.