Galicia promove unha plataforma para obter diagnósticos "fiables" en infeccións
A Xunta destaca a relevancia que terá para o COVID-19 un proxecto autorizado antes da aparición da pandemia
Por E.P. | CORUÑA, A | 06/05/2020 | Actualizada ás 16:34
Galicia desenvolverá unha plataforma tecnolóxica para obter "diagnósticos microbiológicos fiables de calquera patoloxía infecciosa", segundo informa a Xunta tras a visita do titular do Executivo galego, Alberto Núñez Feijóo, ao laboratorio do Complexo Hospitalario Universitario da Coruña (Chuac) onde levará a cabo este proxecto.
Segundo precisa, a iniciativa busca desenvolver "unha plataforma tecnolóxica específica, rápida e totalmente automatizada que permitirá obter diagnósticos microbiolóxicos fiables de calquera patoloxía infecciosa a partir de calquera mostra clínica biolóxica".
Na visita, Feijóo estivo acompañado do persoal do laboratorio --encabezado por Germán Bou, xefe do servizo de Microbioloxía do Chuac--, que serán os encargados de desenvolver o proxecto, dotado con máis de seis millóns de euros.
Actualmente, segundo a Administración autonómica, está a tramitarse o convenio co Ministerio de Ciencia e Innovación, que autorizou o proxecto antes da aparición da COVID-19. "Agora esta iniciativa cobra especial relevancia para diagnosticar o coronavirus e outros patóxenos", subliña a Xunta.
Así, remarca que o diagnóstico dunha patoloxía infecciosa no mesmo día da recepción da mostra ao laboratorio "permitirá un diagnóstico certeiro e preciso desde o inicio, cunha diminución do número de probas diagnósticas complementarias, analíticas e tratamentos innecesarios".
PROBAS DE COVID
Ao fío diso, incide en que Galicia "segue traballando na loita contra a pandemia" provocada polo coronavirus e apunta que, con este obxectivo, "leva xa realizadas máis de 171.000 probas, das cales case 108.000 son PCR".
Asi mesmo, destaca que a posta en marcha desta iniciativa de 'Laboratorio de Microbioloxía 4.0' "redundará de maneira directa na saúde dos cidadáns, cun diagnóstico ultra rápido, a través da detección temperá de bacterias resistentes aos antibióticos, optimizando a terapia antimicrobiana e minimizando a aparición das resistencias bacterianas".
Na mesma liña, engade que permitirá o desenvolvemento dunha solución "que combine a metaxenómica e a culturómica, xunto cunha platafoma Big Data para analizar o microbioma humano e o seu impacto na etioloxía de distintas enfermidades".
"Ademais da creación dun banco pioneiro de microbioma para rexistrar as mostras dos pacientes, e que estará a disposición dos investigadores e clínicos de todo o Servizo Galego de Saúde (Sergas)".
