A Xunta pide ao Goberno que dobre a cantidade de uva permitida para almacenar dunha vendima a outra
As denominacións de orixe e a Administración autonómica acordaron reorientar esta estratexia para "fortalecer" a comercialización do viño galego e fomentar a súa internacionalización.
Por E.P. | SANTIAGO DE COMPOSTELA | 07/05/2020 | Actualizada ás 20:51
A Xunta demandará ante o Ministerio de Agricultura que permita que a cantidade de uva que se pode almacenar dunha vendima a outra pase do 15 ao 30 por cento este ano como medida para "potenciar a comercialización do viño e garantir que toda a colleita se vai recoller e se vai vender ao prezo que corresponde".
Este foi un dos puntos abordados na reunión telemática mantida este xoves polo conselleiro do Medio Rural, José González, cos presidentes e xerentes das denominacións de orixe dos viños galegos e o director da Fundación Juana de Vega, José Manuel Andrade.
Esta entidade é a encargada de pilotar unha estratexia posta en marcha en agosto de 2019 entre varios departamentos da Xunta e a Fundación Juana de Vega para potenciar a dinamización económica, territorial e turística das comarcas vitivinícolas de Galicia.
Ante o panorama actual, no que o sector do viño está a verse afectado polo peche da hostalaría --que aglutina o 60% das vendas--, as denominacións de orixe e a Administración autonómica acordaron reorientar esta estratexia para "fortalecer" a comercialización do viño galego e fomentar a súa internacionalización.
No encontro, o titular de Medio Rural da Xunta trasladou aos axentes do sector que, de cara á vendima deste ano, demandará ante o Goberno central a necesidade de incrementar "o esforzo no almacenamento do produto".
