Por Europa Press / Redacción | SANTIAGO DE COMPOSTELA | 08/05/2020 | Actualizada ás 18:25
O BNG e a Confederación Intersindical Galega (CIG) denunciaron que os traballadores das obras do AVE sofren condicións de "escravitude e explotación" con xornadas que, en ocasións, alcanzaron as 21 horas.
O deputado do Bloque no Congreso, Néstor Rego, presentou unha queixa na Cámara Baixa que recolle a denuncia efectuada pola CIG, que asegura que cada operario "traballa 12,5 horas de media ao día" chegando mesmo en ocasións a "case triplicar" a xornada legal de 8 horas.
"É inadmisible que na execución dunha obra pública os traballadores sexan explotados vulnerando a legalidade. Non se pode consentir que as concesionarias falseen os rexistros da xornada para permitir que, desa forma, os seus operarios dupliquen ou tripliquen a xornada laboral, sen respectar os períodos mínimos de descanso", aseverou Rego.
O parlamentario nacionalista lembra que existe unha "alta taxa de sinistralidade" nos tramos das obras do AVE a Galicia con "numerosos" feridos e accidentes con vítimas mortais. Neste sentido, Rego asegura que a situación dos traballadores é "coñecida e mesmo fomentada" polos mandos, aos que acusa de "presionar" aos operarios co consecuente "aumento das posibilidades de que se rexistre un accidente grave".
Pola súa banda, a CIG entregou un informe na Inspección de Traballo sobre as condicións de traballo nas vías do AVE entre Ourense e Lubiá, en concreto, no tramo máis próximo á Gudiña (Ourense).
A central asegura que nestes traballos se rexistaron "case 70.000 mil horas extras abusivas" nun ano "ante a mirada impasible do Ministerio de Fomento e da Xunta, que unicamente se preocupan polos anuncios electoralistas dos prazos das obras".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.