Por E.P. | SANTIAGO DE COMPOSTELA | 09/05/2020 | Actualizada ás 17:41
O Instituto Galego de Estatística (IGE) comezará a analizar a próxima semana a primeira onda de 50.925 test do estudo epidemiolóxico do Sergas na Comunidade para sacar conclusións sobre a circulación do virus por Galicia.
Despois de que se concluíra esta primeira fase, o Sergas xa empezou a traballar na preparación da segunda onda de test que achegará outras 50.925 probas á cidadanía dentro dunhas catro semanas.
O departamento sanitario galego avanzou que persegue tres obxectivos: coñecer a incidencia do virus de acordo ao sexo, idade e territorio; profundar na monotorización e evolución do coronavirus en Galicia e así adoptar medidas sanitarias máis adecuadas para combater a pandemia.
Por outra banda, o Sergas precisou que na primeira fase foi necesario contactar con 61.836 persoas. Un 49,19% foron mulleres e un 50,81% foron homes. O 15,84% dos participantes foron menores de 19 anos, o 58,59% tiñan entre 20 e 64 anos e o 25,28% eran maiores de 65.
TEST AVALADOS
A pesar de que existen voces críticas -tanto sanitarias como políticas- ao estudo epidemiolóxico da Xunta, a Consellería asegurou que os test anticorpos utilizados para este traballo, que son os que enviou o Goberno central á Comunidade, teñen o aval do Centro Nacional de Microbioloxía e do Instituto de Saúde Carlos III do Ministerio de Sanidade.
Ademais, a OMS recomenda este tipo de test rápidos só para estudos poboacionais e descártanos para un diagnóstico, algo co que coincidiu a Comisión de Expertos da Xunta o pasado 8 de abril.
A Xunta tamén subliñou que este tests dispoñen do marcado CE, o requirimento de homologación europeo, e obtiveron un valor de sensibilidade do 64% cando non se coñece a súa data de inicio que aumenta ao 80% a partir dos 7 días de infección.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.