Partidos, sindicatos e organizacións sociais

Este proposta ten como fundamentos a “Carta do consumo responsable e solidario”. Sinálase nela que o sector agroalimentario galego ten demostrado estar ao máis alto nivel respecto da calidade e seguridade alimentaria dos produtos que se ofrecen no mercado, podendo competir de igual a igual con calquera outro país da nosa contorna. Neste compromiso coa calidade ten feito unha aposta decidida polo aproveitamento sostible dos recursos naturais e pola recuperación de especies, razas e variedades tradicionais adaptadas ao noso hábitat, que permiten darlle aos nosos produtos e ás nosas elaboracións unha personalidade propia, ligada ao noso clima e territorio, xa que logo, inimitable.

 

Temos un deber responsable á hora de decidir por que produtos optarmos, coa conciencia de que os galegos contribúen ao noso desenvolvemento económico, permite fixar poboación e garanten a pervivivencia do noso país. Temos, asemade, un deber solidario con aquelas persoas emprendedoras que deron o paso arriscado de etiquetaren  en  galego as súas elaboracións ou utilizan o noso idioma nas súas campañas de promoción e comunicación, colaborando no mantemento dos nosos valores identitarios.

 

Os consumidores teñen a palabra. Ou deben tomala, se aínda non o fixeron. Porque o seu poder é moito; sen embargo, non fan uso del para esixirlles ás marcas comerciais maior responsabilidades social identificándoas coa nosa lingua. Cómpre xerar un  movemento de opinión favorable que mostre preferenza polas marcas comerciais que etiquen no noso idioma. Neste movemento teñen moito que dicir as organizacións sociais, nomeadamente partidos e sindicatos. A elas correspóndelles o deber de animar aos seus afiliados a secundar esta iniciativa. A esta pedagoxía galeguizadora do consumo dében unir os concellos galegos que por mandato legal debe fomentar o uso do noso dioma en todas as ordes de vida social, cultural e económica.

 

Se os consumidores galegos non somos conscientes do poder que temos para decidir a que produtos debemos apoiar, perderemos soberanía alimentaria e o elemento máis  singular que define a nosa identidade como nación.

 

Neste tempo de celebracións festivas propicio para un  maior consumo temos a oportunidade de poñer en valor os argumentos expostos, espallando nas nosas familias e círculos de amigos esta maneira de facer a través do consumo galeguismo práctica e defensa dos nosos sectores produtivos.

Temos que ser consciente de que a vontade individual de cada un de nós, tanto en canto consumidores, é decisiva para acadar ese obxectivos. Daquela, etiquetados en galego, por favor.