Por Xurxo Salgado | A Coruña | 11/05/2020 | Actualizada ás 22:00
O colectivo de sanitarios segue indignado con Alberto Núñez Feijóo. Moitos deles contactaron coa redacción de Galicia Confidencial nos últimos días para amosar o seu enfado e indignación coas declaracións de Feijóo. O presidente insistía este domingo en destacar que ten o sistema sanitario perfectamente preparado e no mellor momento para afrontar rebrotes de Covid. Hai uns días presumía da situación laboral dos sanitarios e do gran número de contratos realizados nos últimos meses, “ata 1.700”, indicaba.
“Hai unha semanas eramos esenciais, agora somos números dunha campaña electoral”, denunciaban os profesionais neste medio tras superar a primera fase do confinamento e os momentos máis duros da loita contra a Covid. E é que moitos deles son eventuais e traballan por contratos puntuais. De feito, o Sergas ten unha lista de contratación que o pasado ano era de 35.000 persoas. E, algúns deses contratados traballan por días e mesmo por horas. “Eu cheguei a acumular 600 contratos en seis anos”, apuntaba Diego.
O presidente da Xunta, Alberto Núñez Feijóo, sorprendeuse este venres polas críticas do colectivo de sanitarios que nos últimos días lles fixeron chegar a este medio e que denuncian a súa precarización laboral e lembrou que nos últimos meses o Sergas realizou 1.700 contratacións. A maioría deses contratos, como denuncian os profesionais, son por días ou semanas e non se respectan as listas do propio Sergas.
OS SANITARIOS, CANSOS
As declaracións acenderon aínda máis o ánimo dos profesionais que estouparon este luns tras escoitar o venres e tamén este domingo ao presidente da Xunta presumir da situación da sanidade pública galega. “Nunca houbo tantas camas libres de UCI e hospitalización”, dixo destacando que esta situación permite que Galicia teña pasado á fase 1 e poida xa pensar na fase 2. Así, apuntaba que o 63% das camas UCI e o 49% das camas en hospitalización “están libres”. “Nunca tivemos tanta potencia instalada para patoloxías como neste momento”, destacou. Unha situación, dixo, que é moi propicia para “ir avanzando de fases”.
“Moitos de nós estivemos traballando en primeira liña, moveunos dos nosos servizos para traballar en unidades de COVID e a cambio recibimos unha situación de desemprego sen unha causa xustificada e sen optar a ningunha compensación”, denuncia a sanitaria Natalia en declaracións ao Galicia Confidencial.
“Non sei se con isto déronse de conta que quedamos na rúa, quedamos sen puntuar para as listas de contratación e quedamos sen cobrar. O que nos fai que nos sintamos desprezadas polo trato da nosa sanidade pública”, critica ao insistir na “falta de respecto e abuso de autoridade” do Sergas.
Tamén a técnica Sanitaria Laura di que Feijóo manipula a situación da sanidade pública. “Déixanos na rúa ás que levabamos moitos meses con pacientes covid , ata que veu toda esta xente , só estabamos nós ,sen axuda , e agora deciden que non somos ninguén, ignórannos e pretenden dicir que o fixeron ben”, indica en declaracións a este medio.
Tanto Natalia como Laura refírense a que o Sergas non está respectando a lista de contratación tras ampliar contrato aos MIR e EIR e outros profesionais contratados en marzo para afrontar o pico do coronavirus. Un feito que denunciou o Sindicato dos Profesionais da Sanidade Pública Galega (Prosagap) a pasada semana e tamén este luns CIG-Saúde.
SINDICATOS
Prosagap confirmaba a existencia desta situación e comezou xa a denunciar ante as xerencias hospitalarias. Así, acusaba á Xunta de utilizar o estado de alarma, o Sergas está “incumprindo” os acordos laborais asinados, incluíndo o propio pacto de selección temporal .
Unha situación que segundo indica provoca que non exista un criterio “sólido e unánime” que xustifique a renovación ou ampliación de determinados contratos e o cese doutros . “Os principios de publicidade, mérito e capacidade que deben rexer o emprego público neste momento desapareceron”, apuntaba.
Tamén este martes, CIG-Saúde reclamaba a "publicación inmediata" das listas de contratación do persoal facultativo e a convocatoria da Mesa Sectorial para abordar, entre outras cuestións, as necesidades das unidades de hospitalización, UCI e Atención Primaria en relación á COVID-19.
Esta central sindical reitera que a decisión de prorrogar os contratos MIR e EIR suporá que o persoal das listas "non poida traballar" porque esa "contratación vai pasar por encima de todo o persoal inscrito nas actuais listas de contratacións".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.