Por Europa Press / Redacción | SANTIAGO DE COMPOSTELA | 12/05/2020 | Actualizada ás 13:58
O portavoz da coalición Galicia en Común-Anova Mareas, Antón Gómez-Reino, e a portavoz nacional do BNG, Ana Pontón, coincidiron este martes en que convocar eleccións neste momento é unha "temeridade" e unha "irresponsabilidade".
A convocatoria de eleccións é unha potestade estatutaria que lle outorga ao presidente da Xunta a capacidade plena de disolver o hemiciclo e chamar ás urnas, como fixo o pasado 11 de febreiro, despois de que tamén o anunciou o lehendakari, Iñigo Urkullu.
Pero a situación de crise sanitaria levou aos partidos políticos a pactar a suspensión da cita electoral, prevista para o 5 de abril, o cal obtivo o aval xurídico da xunta electoral. No decreto aprobado polo Consello da Xunta, do 18 de marzo, recóllese que o presidente do Goberno autonómico terá que consultar ás principais forzas políticas, tendo en conta que entenden os xurídicos que o proceso de consenso que levou ao adiamento da cita electoral debe terse en conta á hora de reinicialo.
"IRRESPONSABILIDADE HISTÓRICA"
Antón Gómez-Reino considera que "quen actúe en clave de campaña" nun momento como o actual "comete unha irresponsabilidade histórica", pois cre que é necesario que as forzas políticas traballen en combater os efectos da epidemia, tanto a nivel de saúde como económico.
"Non estamos en campaña electoral. Nin sequiera en precampaña. Quen pense ou actúe coma se estivésemos en campaña electoral é un irresponsable que está a pór en perigo a saúde de todas as galegas", apuntou Gómez-Reino, que pide que a "lexítima rivalidade democrática dunha campaña non sexa obstáculo para a recuperación das garantías de saúde e a reconstrución socioeconómica" do país.
Neste sentido, lamentou que a Xunta sexa "líder en opacidade" á hora de ofrecer información sobre a pandemia, o que lle levou a sentenciar que "os datos salvan vidas", polo que instou ao Executivo autonómico a actuar de forma "máis" transparente.
"TEMERIDADE"
Tamén en rolda de prensa este martes, Ana Pontón dixo que é unha "temeridade" chamar ás urnas neste momento, cando o que se "necesita é un goberno e un conxunto da sociedade" centrados en "gañar a batalla" ao coronavirus. "Feijóo é o único galego que está a pensar nas eleccións, os galegos están preocupados por como van conciliar, como van pagar facturas, por se van ter emprego...", enumerou.
Dito isto, a dirixente nacionalista lembrou que o acordo dos grupos políticos non era só convocalos previamente á fixación de nova data, senón que tamén pactaron que mentres estivese de alarma non se convocaría unha nova cita coas urnas, polo que, se se cumpre o acordado, ata polo menos o 25 de maio non poderían sinalarse novos comicios no calendario.
"E agora, cando a unidade na loita contra o covid-19 é máis importante que nunca, xa non considera unha prioridade a loita contra o coronavirus, nin priorizar a saúde dos galegos. Non é o momento de eleccións, estamos nunha situación que require que todos os gobernos estean na loita contra o covid-19", aseverou Ana Pontón, quen insistiu en que se trata de "unha auténtica temeridade falar de convocatoria electoral".
Pero "se quere ir a eleccións canto antes, ten que convocar xa aos partidos políticos". Neste sentido, asegurou que lle trasladará que considera que se trata dunha "temeridade" e que "ningún galego está a pensar niso, senón en facerlle fronte" ao coronavirus.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.