Denuncian a Navantia Ferrol ante Inspección de Traballo por "non preservar a saúde dos traballadores"
CIG e CXT aseguran que "a dirección de Navantia está empeñada en aumentar o número de traballadores na factoría, antepondo as razóns produtivas á saúde dos operarios".
Por Europa Press / Redacción | SANTIAGO DE COMPOSTELA | 14/05/2020 | Actualizada ás 19:03
As seccións sindicais de CIG e CXT en Navantia Ferrol denunciaron a empresa naval pública ante Inspección de traballo ao considerar que non hai no estaleiro as condicións necesarias para preservar a saúde dos traballadores ante a ameaza da COVID-19.
A través dun comunicado, aseguran que o protocolo que está en marcha na compañía pública produce "todos os días incidentes, especialmente relacionadas coa hixienización das instalacións". Por iso, afirman que a normativa acordada entre a parte social e a dirección da empresa "non se está cumprindo".
Critican estes sindicatos que, a pesar da situación creada, "a dirección de Navantia está empeñada en aumentar o número de traballadores na factoría, antepondo as razóns produtivas á saúde dos operarios", unha situación que "non é aceptable".
CIG e CXT sosteñen que na reunión do comité de empresa celebrada o pasado sábado, 9 de maio, "expúxose que o comité denunciase a situación na Inspección de traballo, pero a proposta non tivo o apoio doutros sindicatos". Neste comité, ademais de delegados de CIG e CXT, tamén están representadas as organizacións CC.OO., que é a maioritaria, UGT e MAIS.
Por último, conclúen que, ante a situación xerada, as seccións sindicais da CIG e da CXT decidiron "presentar unha denuncia conxunta, que se espera axude a corrixir as deficiencias que se observan acotío".
