Por Europa Press / Redacción | SANTIAGO DE COMPOSTELA | 15/05/2020 | Actualizada ás 16:40
O BNG denunciou no Congreso a "vulneración dos dereitos lingüísticos que viven cada día miles de persoas que falan galego e a resistencia por parte do Goberno central á posta en marcha de políticas que favorezan o uso deste idioma e contribúan a aumentar o número de galegofalantes.
Por esta razón, o deputado Néstor Rego esixiu ao Goberno que se implementen as medidas necesarias para dar cumprimento ás recomendacións do Comité de Ministros de Europa sobre o respecto do contido da Carta das Linguas Minorizadas.
"Entre elas, pídese ao Goberno de España que asegure no ámbito educativo a protección de todas as linguas oficiais, que se fomente o uso delas por parte das autoridades xudiciais, permitindo a realización dos procedementos noutros idiomas oficiais distintos do español, e tamén fai especial fincapé no uso das distintas linguas oficiais por parte da Administración Xeral do Estado", destacou Rego.
O parlamentario asegurou que, a pesar destas recomendacións, no que vai de lexislatura, o BNG tivo que presentar distintas iniciativas en relación con "numerosos incidentes que en que a Administración Xeral do Estado non cumpría a legalidade vixente e non respectaba os dereitos lingüísticos dos galegos".
"Continuamente atopámonos con trabas que dificultan a vontade de vivir e expresarse na nosa lingua, páxinas web ou documentación dos ministerios non accesible nas distintas linguas oficiais, formularios e impresos que non existen ou non poden obterse noutras linguas distintas do español, peticións de tradución dos documentos achegados e continuas deformacións da toponimia que a Administración Xeral do Estado se empeña en españolizar", sinala.
Fronte a iso, o BNG propuxo acometer unha revisión das diferentes vías de comunicación entre a administración e a cidadanía (páxinas web, formularios, impresos, folletos informativos) para asegurar que todos estes mecanismos sexan accesibles nas distintas linguas oficiais.
Ademais, urxiu a corrección da toponimia propia de Galicia en todas as comunicacións que realiza a Administración central así como a formación dos seus traballadores para que no seu traballo diario respecten esa toponimia e os dereitos lingüísticos dos cidadáns.
EXCLUSIÓN DA CIG
Por outra banda, o Bloque, a través da deputada Montse Prado, rexistrou no Parlamento de Galicia unha pregunta oral na que pide á Xunta que explique os criterios polos que "excluíu" o sindicato CIG das reunións para tratar a situación laboral, económica e social motivada pola crise da COVID-19 a pesar de "ser a primeira central sindical de Galicia".
A formación censura que o pasado 13 de maio o presidente da Xunta, Alberto Núñez Feijóo, se reunise de forma telemática cos secretarios xerais de UGT e CCOO e con representantes do patronal pero non chamase á central nacionalista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.