A Unión Europea concede a Pontevedra o seu primeiro premio de Seguridade Viaria Urbana
O xurado do premio asegura quedar "impresionado", entre outras medidas, cos límites de velocidade que oscilan entre os 10 e os 30 quilómetros por hora, con que o 80% dos nenos vaian sós á escola ou coa creación de espazos públicos "atractivos" para os cidadáns.
Por Europa Press / Redacción | SANTIAGO DE COMPOSTELA | 18/05/2020 | Actualizada ás 15:18
Pontevedra gañou o primeiro premio de Seguridade Viaria Urbana da Comisión Europea. A cidade do Lérez quedara finalista con Jaworzno (Polonia) e Ordu (Turquía), entre outras 26 que concorreron a este premio.
A Comisión Europea premia as boas prácticas da capital da provincia en materia de mobilidade sustentable destacando que a Boa Vila logrou reducir as mortes na estrada de maneira "consistente" desde 1999, alcanzando a "impresionante cifra" de cero falecidos desde fai nove anos.
"Espero que isto sirva de inspiración para os pobos e cidades que están a reconsiderar as súas estratexias de mobilidade, especialmente por mor da pandemia actual", trasladou a comisionada de Transporte, Adina Valean.
O xurado asegura quedar "impresionado", entre outras medidas, cos límites de velocidade que oscilan entre os 10 e os 30 quilómetros por hora, con que o 80% dos nenos vaian sós á escola ou coa creación de espazos públicos "atractivos" para os cidadáns.
O alcalde de Pontevedra, Miguel Anxo Fernández Lores, comunicou a noticia ao resto de membros da Corporación municipal ao terminar o pleno celebrado hoxe luns.
REFERENCIA INTERNACIONAL
Nunha posterior comparecencia ante os xornalistas valorou o premio como unha "gran satisfacción" e celebrou que "Pontevedra se está situando ben no mundo".
O rexedor do BNG lembrou que a cidade foi convidada por dous ministerios a participar no Cume do Clima, trasladando a súa experiencia sobre a redución da contaminación urbana.
"Estamos a ser unha referencia a nivel internacional", destacou, tanto pola recuperación dos espazos urbanos como polo exemplo demostrado polos seus veciños ao saír á rúa nestes momentos de crise sanitaria.
