A contratación de maiores de 45 anos afúndese un 67% en Galicia
A caída da contratación na comunidade é 11 puntos maior que o do conxunto do estado.
Por Europa Press / Redacción | SANTIAGO DE COMPOSTELA | 19/05/2020 | Actualizada ás 17:54
A contratación de maiores de 45 anos afundiuse un 67% en Galicia en abril en comparación co mesmo mes do ano anterior a raíz do impacto da crise do coronavirus, segundo un estudo de Randstad con datos procedentes do Servizo Público de Emprego Estatal (SEPE).
A caída da contratación na comunidade é 11 puntos maior que o do conxunto do estado(do 56%). Supón que se deixaron de asinar preto de 14.700 contratos en Galicia, ao pasar de 21.880 de abril de 2019 aos 7.185 actuais.
En canto á tipoloxía dos contratos asinados en Galicia polos maiores de 45, Randstad percibe un derrube da contratación indefinida do 59,1%, ao pasar das 1.986 firmas de 2019 ás 812 actuais, e o seu peso con respecto do total redúcese ata o 11,3%. A temporal, pola súa banda, tivo un descenso do 68%, e reduciuse de 19.894 contratos a 6.373.
Pontevedra (-65,5%) e Ourense (-67,6%) rexistraron as caídas menos pronunciadas na contratación de maiores de 45 anos, seguidas por Lugo (-68,2%) e A Coruña (-68,5%).
Por sectores, a contratación reséntese máis en España en servizos (-71,7%), mentres que a menos afectada foi agricultura (-11,7%).
