O PSOE rexeita intervir para frear a moción de censura de Catoira contra o BNG
O Bloque manifesta a súa sorpresa polo feito de que o PSOE pacte co PP en contra do Bloque para repartirse a Alcaldía.
Por E.P. | PONTEVEDRA | 20/05/2020 | Actualizada ás 20:28
A dirección nacional do BNG pediu ao PSOE que interveña para frear a moción de censura presentada polo grupo socialista e o do PP contra o goberno municipal de Catoira, cuxa alcaldía ostenta o nacionalista Xoán Castaño.
En concreto, neste municipio goberna o BNG (tres concelleiros) xa que o seu candidato recibiu o apoio do tres edís do PP na sesión de investidura e despois de que o socialista, Alberto García, perdese a maioría absoluta ao ceder dúas actas e quedar con cinco concelleiros.
Nun comunicado remitido aos medios, o Bloque manifesta a súa sorpresa polo feito de que o PSOE pacte co PP en contra do Bloque para repartirse a Alcaldía e pregunta á formación de Gonzalo Caballero "se esa é a forma que ten o PSOE de entender o cambio en vésperas de celebrarse as eleccións galegas".
Por iso, pide á dirección do PSOE que tome cartas "inmediatas" no asunto para pór freo a esa moción de censura "man a man co PP", á vez que reafirmou o compromiso do BNG para conseguir un "cambio real en Galicia" que, segundo indicou, pasa porque o PP perda a maioría absoluta o próximo 12 de xullo.
O PSOE REXEITA A MOCIÓN
Pola súa banda, o secretario provincial do PSOE de Pontevedra, David Regades, asegurou que a súa formación rexeita os pactos co PP "agora e sempre". "Mesmo cando o BNG usou os votos do PP para usurpar a Alcaldía de Catoira que o PSOE gañara nas urnas", sinala.
Así mesmo, lembrou que o Partido Socialista xa abriu un expediente por este motivo a Alberto García, unha sanción que "está en curso".
Neste sentido, subliñou que o PSOE ten unha norma "moi clara" que é que "non se pode pactar co PP" e que por iso barió este expediente.
