Por Europa Press / Redacción | PONTEVEDRA | 22/05/2020 | Actualizada ás 11:56
A Audiencia Nacional desestimou o recurso contencioso administrativo interposto pola Asociación Pola Defensa da Ría de Pontevedra (APDR) que pretendía que se declarase a caducidade total da concesión outorgada á fábrica de Ence en Pontevedra.
Segundo informa a compañía, o tribunal desestimou todos os motivos esgrimidos pola APDR en contra da concesión. Entre eles, o argumento de que a planta xere efectos prexudiciais para o medio ambiente. Na súa sentenza, a Audiencia Nacional sinala que se atopa en vigor unha Autorización Ambiental Integrada (AAI) e que o recurso da asociación non acredita que se incumprise, engade Ence.
Así mesmo, o grupo valora que o fallo profunda na postura que xa manifestou a Audiencia Nacional cando, en decembro de 2018, ditou unha sentenza paralela, en relación a un recurso do Concello de Pontevedra que empregaba a mesma argumentación que a esgrimida pola APDR.
Á ESPERA DE RESOLUCIÓN POLA PRÓRROGA
Doutra banda, Ence está á espera de que a Audiencia Nacional dite sentenza, previsiblemente na segunda metade deste ano, sobre os tres recursos --de APDR, Concello de Pontevedra e Greenpeace-- expostos contra a prórroga concedida no seu día polo Goberno en funcións de Mariano Rajoy durante 60 anos máis ata 2073.
No seu día, a Avogacía do Estado desistiu da defensa da prórroga a Ence, no marco dos tres procedementos abertos, xa que considera que a prórroga da concesión do Goberno en funcións do PP en xaneiro de 2016 non foi "conforme a dereito".
De tal forma, na súa argumentación baséase, entre outros antecedentes, nun ditame do Consello de Estado que fixa que "o prazo máximo" dunha concesión é de 75 anos, sen que se "poida exceder" ese límite. En 1958 estableceuse unha concesión de 75 anos que caduca en 2033 para a pasteira, por iso o Goberno apunta que a prórroga outorgada en 2016 por 60 anos (a contar desde a data de solicitude en 2013, ata 2073) "non sería conforme a dereito".
Pola súa banda, Ence, que sinala que traballa para avanzar "na apertura e o diálogo" coas comunidades onde está presente, expresa o seu firme compromiso coa sustentabilidade e "o seu decidido propósito" de contribuír á saída da actual crise sanitaria e económica a través dun modelo de negocio que profunda nos principios da economía circular.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.