Por Europa Press / Redacción | SANTIAGO DE COMPOSTELA | 22/05/2020 | Actualizada ás 12:59
Os representantes do Goberno central das catro provincias galegas autorizaron as 'Caravanas por España y su liberdade' que Vox convocou para este sábado en todo o territorio nacional, para protestar contra o Executivo de Pedro Sánchez e a súa "nefasta xestión da crise".
A pesar das restricións que supón a vixencia do estado de alarma e que Galicia, como a maioría da Península, aínda se atopa na fase 1 da desescalada; as subdelegacións do Goberno de cada provincia autorizaron esta protesta que o partido convocou para realizar desde vehículos particulares.
Desta maneira, Vox chama á cidadanía a manifestarse formando unha caravana de coches a partir das 12,00 horas deste sábado, 23 de maio, nas cidades da Coruña, Lugo, Ourense, Pontevedra e Vigo, así como no resto de capitais de provincia do Estado.
Fontes da Delegación do Goberno confirmaron a Europa Press que a convocatoria exposta polo partido liderado por Santiago Abascal se resolveu como "lícita". Pola súa banda, Vox asegurou que "existe o firme compromiso de respectar a normativa vixente en materia de medidas de distanciamento, hixiene e etiqueta respiratoria en todo momento".
Tamén precisou que os asistentes "unicamente poderán participar desde un coche; é dicir, non se lles permitirá formar parte da manifestación a persoas que vaian en bicicleta, moto ou a pé" e todos terán que "manterse dentro dos seus coches co fin de participar dunha forma segura e cumprindo cos protocolos sanitarios esixidos".
O partido informou de que na Coruña o percorrido comezará no parking do pavillón de deportes de Riazor; en Lugo na rotonda de Garabolos; en Ourense iniciarase na rúa Progreso; e en Pontevedra na rotonda da estación de tren.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.