Reabren os mercados de gando en Galicia

O Diario Oficial de Galicia (DOG) publica este venres os protocolos e normas que deben seguirse nos mercados de gando que en Galicia reabrirán a partir deste sábado. Algunhas das indicacións que recolle o documento oficial publicado apuntan a que só as persoas que vaian efectuar operacións de compravenda ou transporte poderán participar nestes mercados e ademais a entidade organizadora terá que realizar un control na entrada principal para permitir o acceso ás instalacións.

Por outra banda, a carga e descarga do gando realizarase de forma gradual para evitar a confluencia de persoas e a entrada nas dependencias veterinarias producirase de forma individual. A maiores, os usuarios do recinto deberán portar máscaras, respectar a distancia física interpersoal de dous metros e nas zonas de acceso colocaranse dispensadores de xel hidroalcohólico, e habilitaranse biombos ou outros elementos de protección para asegurar o distanciamento cos operadores.

Por outra banda, de exisitir a posibilidade, nas dependencias destes mercados de gando habilitaranse distintos puntos de entrada e saída para que non exista cruzamento de persoas e nos edificios administrativos limitarase o aforamento máximo.