Por E.P. | SANTIAGO DE COMPOSTELA | 25/05/2020 | Actualizada ás 15:44
A Xunta abre ata o 8 de xuño a convocatoria de espectáculos galegos para a súa contratación durante o segundo semestre dentro da actividade anual da Rede Galega de Teatros e Auditorios, unha iniciativa que busca recuperar a programación perdida durante a emerxencia sanitaria e que propón iniciativas para adaptala á actual situación como os espectáculos ao aire libre ou a bonificación de funcións consecutivas.
Así, segundo informou a Xunta, este chamamento a compañías e artistas faise con "unha serie de medidas" que "flexibilizan a normativa" deste circuíto, co obxectivo de deseñar unha carteleira ata final de ano que permita recuperar a actividade perdida.
As novas medidas propostas aos 40 concellos titulares de espazos membros desta rede forman parte do Plan de Reactivación dos sectores Cultural e Turístico aprobado pola Xunta e supoñen "modificacións importantes" na normativa habitual deste programa, recoñece o Goberno galego.
Deste xeito, por exemplo, para facilitar a programación, permitiranse as actuacións ao aire libre durante os meses de verán, en escenarios pechados diferentes aos adscritos á Rede ou como parte de festivais, mostras ou certames organizados polas distintas localidades.
Con esta flexibilidade de funcionamento, espérase que todos os espazos acollidos esgoten os créditos consignados para o ano 2020 dentro desta liña de programación, mediante o compromiso de recolocación de todas as funcións aprazadas.
FUNCIÓNS CONSECUTIVAS
Seguindo este obxectivo, a Agadic, dependente da Consellería de Cultura, fomentará a contratación de funcións consecutivas do mesmo espectáculo en cada espazo, incrementando as súas porcentaxes de achega nas segundas e terceiras funcións dun mesmo evento nun mesmo escenario.
O prazo de inscrición de espectáculos e concertos permanecerá aberto desde este luns e ata próximo 8 de xuño a través da web profesional www.galescena.gal. A convocatoria queda reservada a compañías de teatro e grupos musicais galegos, xa que para as formacións procedentes de fóra de Galicia prorrógase a selección que fora realizada para o primeiro semestre de 2020.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.