Piden que a Fiscalía investigue o incendio do vertedoiro Santiago-Miramontes

A Plataforma de afectados polo vertedoiro de Santiago de Compostela - Miramontes piden a intervención da Fiscalía para que investigue o incendio que tivo lugar na madrugada deste luns, 25 de maio, do vertedoiro de Grixoa-Miramontes, coñecido como o “Complexo Ambiental Miramontes".

Á espera dos informes de bombeiros e policía Nacional, integrantes da plataforma afirmaron que era insoportable respirar ese fume, provocando proído nos ollos e na gorxa. Esta Plataforma solicitará ditos informes, que son previos á utilización por parte da empresa de bulldozer e maquinaria pesada para soterrar e apagar o lume.

Esta Plataforma, á vista das fotografías e vídeos tomados, está preocupada pola posibilidade de que a impermeabilización do vaso do vertedoiro, se puidese ver alterada polo incendio. Así mesmo, tal e como está recollida na denuncia de Fiscalía, a cantidade de materia orgánica que está depositada no vaso é moi superior ao 10% permitido e recollido no proxecto construtivo do vertedoiro.

"Por todo isto, e cunhas instalacións a menos de 500 m de casas habitadas, que clamarían ao ceo nun país civilizado, pedimos á Fiscalía de Medio Ambiente que entre de oficio na Investigación deste cuarto incendio, porque chove sobre mollado", indica a plataforma nun comunicado.

Esta denuncia súmase aos informes que xa obra en poder da Fiscalía de Medio Ambiente relativos a este vertedoiro, que propiciaron a presentación en 2019, por parte da mesma, de dúas querelas trasladadas aos xulgados contra as empresas xestoras por mor de incumprimentos constatados: Sertego Servicios Medioambientais, SL e Tecnosolos Galaicos, SL.