A COVID-19 afunde a liquidez das empresas: O 79% acepta prazos de pago superiores aos desexados
A pandemia está afectando, sobre todo, a situación económica das pemes. As grandes empresas resisten mellor.
Por Galicia Confidencial | Santiago de Compostela | 26/05/2020 | Actualizada ás 22:20
O 79% das empresas debe aceptar prazos de pago superiores aos desexados desde que comezou a crise do coronavirus. Así, e de acordo co Estudo da Xestión do Risco de Crédito en España, que impulsan Crédito e Caución e Iberinform, o actual contexto económico está a provocar un empeoramento dos prazos de pago nas operacións comerciais que está a afectar seriamente á liquidez das empresas.
Fronte aos datos de 2019, o mellor rexistro desde que se realiza este estudo, 2020 reflicte o peor comportamento de toda serie histórica. Así, un 24% de empresarios e autónomos recoñecen que traballan por encima dos 90 días, unha taxa que duplica a de 2019. Só o 33% das empresas opera cos prazos inferiores aos 60 días que tratou de impulsar a Lei 15/2010 de Medidas de Loita contra a Morosidade. Hai un ano, practicamente a metade do tecido empresarial traballaba a menos de 60 días.
O mellor comportamento rexístrase no sector público e o peor entre as pemes. Só o 8% das empresas que ten relacións comerciais coa Administración ten que aceptar unha extensión dos prazos de pago, unha porcentaxe similar a 2019. A capacidade dos autónomos para impor prazos de pago tamén se mantén estable, no 19%.
Por primeira vez desde que se realiza este estudo, rexístrase un peor comportamento entre as pemes que na gran empresa. O 41% das empresas tivo que aceptar prazos de pago superiores aos desexados por parte de grandes empresas, fronte 50% que tivo que alargar os prazos para traballar co segmento de pemes. Este xiro no comportamento garda relación con outras evidencias que deixa o estudo, como o incremento dos problemas de liquidez do tecido empresarial.
Nese sentido, ao abordar as razóns que explican a morosidade empresarial, por primeira vez desde 2016, a falta de dispoñibilidade de fondos (55%) volve ser a razón máis citada, por diante do atraso intencionado dos clientes (45%). A complexidade do procedemento de pagos (15%), as disputas sobre a calidade dos bens e servizos fornecidos (6%) ou a emisión de facturas incorrectas (4%) completan as motivacións esgrimidas polos clientes para atrasar os seus pagos.
