Por E.P. | VIGO | 27/05/2020 | Actualizada ás 12:04
O número de casos activos de COVID-19 en Galicia volveu a baixar e sitúase en 823 (11 menos que hai un día), dos que 54 son pacientes hospitalizados, 5 en Unidades de Coidados Intensivos e 49 en unidades convencionais, segundo os datos trasladados este mércores pola Consellería de Sanidade.
Fontes de Sanidade precisaron que, dos casos activos, 254 correspóndense coa área sanitaria de Vigo, 205 son da área da Coruña, 143 da área sanitaria de Santiago, 107 da área de Ourense, 54 da área de Lugo, 38 da área de Pontevedra e 22 correspóndense coa área sanitaria de Ferrol.
Con respecto aos pacientes hospitalizados, este mércores informouse de 49 persoas ingresadas 'en planta' (tres menos que hai un día) e 5 persoas ingresadas en Unidades de Coidados Intensivos (dous menos que hai un día). Así mesmo, reduciuse o número de casos en seguimento domiciliario, de 775 a 769.
Por outra banda, segundo os datos trasladados por Sanidade, xa se recuperaron do COVID 9.798 persoas, tras rexistrarse 34 novas altas epidemiolóxicas nas últimas horas. O número de probas PCR realizadas en Galicia ascende a 137.544, despois de que se fixesen case 1.500 probas máis nas últimas horas.
Finalmente, Sanidade ratificou que, ata este martes, rexistráronse en Galicia 615 falecidos con coronavirus, dos que 272 estaban vinculados con residencias (132 deles morreron nos propios centros xeriátricos).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.