Por E.P. | Santiago de Compostela | 28/05/2020 | Actualizada ás 16:34
A Xunta aumentará ata 2,4 millóns de euros os anticipos ao sector do transporte para ofrecerlle liquidez ás empresas ante a crise pola COVID-19.
A conselleira de Infraestruturas, Ethel Vázquez, reuniuse este xoves por videconferencia cos responsables das federacións de transporte de pasaxeiros por estrada.
O Goberno galego achegou entre marzo e abril un millón de euros en anticipos polos servizos de transporte interurbano, mentres que entre maio e xuño adiantará 1,4 millóns de euros máis.
En sentido, a Administración autonómica xustificou ante o Executivo central a solicitude dunha compensación de oito millóns de euros pola actividade durante o estado de alarma. O mércores achegou máis documentación a requirimento do Ministerio.
Así, a Xunta urxe a activación deste fondo estatal polo déficit de explotación das actuais concesións e garantir a sustentabilidade do sector.
MEDIDAS NO DOG
Así mesmo, abordouse a orde publicada este xoves no Diario Oficial de Galicia (DOG) sobre transporte público de titularidade da Xunta, que establece a obrigación de deixar baleiro o asento contiguo ao que ocupa cada viaxeiro, agás se se trata de persoas que conviven. Se están separados por corredor non se consideran contiguos.
A fila detrás do condutor poderá ocuparse se o vehículo ten biombo que proporcione a protección necesaria. Nos vehículos con prazas de pé poderá haber só dous usuarios por metro cadrado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.