As forzas e corpos de seguridade representan o grupo da Administración no que máis confían os galegos
En segundo lugar está o sistema sanitario. O sistema político, o peor valorado.
Por Europa Press / Redacción | Santiago de Compostela | 29/05/2020 | Actualizada ás 14:43
As forzas e corpos de seguridade e o sistema sanitario representaron, por esta orde, os grupos profesionais dependentes da Administración que máis confianza xeran na galegos fronte ao sistema político, que recibiu as peores valoracións.
Segundo unha enquisa do Instituto Galego de Estatística (IGE) elaborada en 2019 cuxos resultados foron publicados este venres, as forzas e corpos de seguridade recibiron un 7,06 sobre 10 respecto da confianza que transmiten aos cidadáns, mentres o sistema sanitario (6,8) e o Exército (6,62) tamén se atoparon entre os mellor valorados. As puntuacións máis baixas foron adxudicadas ao sistema político (3,30), a banca (3,63) e as institucións relixiosas (3,67).
O IGE tamén destacou que, entre 2014 e 2019, aumentou a confianza media dos galegos en todas as entidades, excepto nos medios de comunicación (-0,02%) e as ONG (-0,24%). En cambio, o sistema xudicial foi a institución na que máis se elevou o nivel medio de confianza (1,51%), seguido polo sistema político (1,5%).
Respecto da confianza nas persoas, a puntuación media dos familiares sitúase en 8,79 puntos. Ademais, o 68,27% dos enquisados outorga unha puntuación de nove ou 10. A valoración da confianza depositada nos amigos ascende a 8,06 puntos, mentres que para outras persoas baixa a 5,72 puntos nunha escala de 0 a 10.
