Por Europa Press / Redacción | SANTIAGO DE COMPOSTELA | 30/05/2020 | Actualizada ás 14:34
O Concello de Pontevedra terá festas este verán nunha decena de escenarios repartidos por diferentes puntos da cidade, nos que se estudou o aforamento e as distancias.
Así, barállanse puntos como Monte Porreiro, O Burgo, Barcelos, San Antoniño, Campolongo, Eduardo Pondal, o río Gafos e sitios no centro histórico como a Alameda, a Praza de España ou a Praza da Ferrería.
A programación definitiva farase pública en aproximadamente dúas semanas, á vez que se traballa na Feira Franca para setembro e co obxectivo de recuperar o festival de música Surfing the Lérez nun novo formato este ano.
Pola súa banda, a programación de verán comezará a principios de xullo e incluirá opcións para todo tipo de públicos e con variedade de estilos e disciplinas como teatro, música, audiovisual ou maxia.
A concelleira de Festas, Carme da Silva, asegurou o venres que "sen ningunha dúbida" Pontevedra vai ter festas. "Teremos unha programación coherente con evitar grandes aglomeracións", sostén.
A principal novidade é que se habilitará un gran número de escenarios en espazos públicos con actuacións simultáneas por toda a cidade e polos barrios.
Carme da Silva cre que non é bo suspender as festas como está a ocorrer en moitas cidades. "Nós pensamos que unha cousa é que non se poidan celebrar no formato habitual e outra cousa é que non haxa festas", afirma.
REPROGRAMACIÓN
Neste sentido, a edil nacionalista comentou que "antes" o éxito dunha programación festiva "medíase" polos miles de persoas que era capaz de congregar nun espazo, pero este ano fíxose "un esforzo enorme para reprogramarlo todo para que o éxito se mida pola variedade de cousas que hai simultaneamente para evitar precisamente as grandes aglomeracións".
Da Silva sostén que neste momento se traballa coa hipótese de que os espectáculos estarán regulados polas condicións de seguridade da Fase 3 da desescalada ou polas condicións da Fase 3 relaxadas.
DINAMIZACIÓN DA ECONOMÍA LOCAL
Carme da Silva tamén sinala que este novo formato "supón un esforzo económico moi importante" por que implica montar máis escenarios e adoptar medidas hixiénicas e de control de aforamento, pero valorou que "o importante é que son recursos que se inxectan directamente na economía local".
A intención do Concello é que nas festas deste verán a "inmensa maioría dos grupos sexan de Pontevedra, da contorna ou galegos". Ademais, as empresas que van traballar en creatividade, montaxe ou produción "son todas da zona".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.