“Ser fariña doutra muiñada”, “ser viño doutra cepa” ou “ser fariña doutro saco”, equivalentes á expresión castelá “ser harina de otro costal”
O lingüista Xosé Antonio Pena Romay publica unha nova entrega da sección de fraseoloxía "Verbas sisudas non queren testemuñas".
Por Xosé Antonio Pena | Santiago de Compostela | 07/06/2020 | Actualizada ás 12:00
Para darmos a entender que unha cousa vén a ser algo moi distinto daquilo do que se está a falar, ou ben que unha persoa é totalmente diferente a aquela con quen se compara, en castelán adóitase empregar a paremia ser harina de otro costal. Vexamos algunhas das locucións que en galego espremen esa mesma significación:
Ser harina de otro costal
{= Ser unha cousa algo moi distinto daquilo do que se está a falar, ou ben ser unha persoa alguén totalmente distinto a aquela con quen se compara.}
Ser fariña doutra muiñada
Ser viño doutra cepa
Ser fariña doutro fol
Ser fariña doutro saco
[E MESMO]:
Ser fariña doutra taleiga
Ex.: Tras el coronavirus va a haber cosas que, sin duda, cambiarán, pero eso de que la mayoría de las grandes fortunas vayan a mirar más por el bien común ya es harina de otro costal.
Tras o coronavirus vai haber cousas que abofé van cambiar, pero iso de que a maioría das grandes fortunas vaian mirar máis polo ben común xa é fariña doutra muiñada ‡ viño doutra cepa ‡ fariña doutro fol ‡ fariña doutro saco.
● Tamén, en bastantes contextos:
Ser otra cosa # otro cantar # otro tema # otro asunto # otra cuestión
Ser outro conto # outra cousa # outro cantar # outro tema # outro asunto # outra cuestión
NOTA:
As expresións galegas están tiradas das seguintes fontes:
- Recolleita propia da oralidade galega.
- Recolleita propia documental (artigos de prensa, artigos ou comentarios na Rede, obras escritas, folletos publicitarios, etc.).
- Martínez Seixo, Ramón Anxo (dir.): Dicionario fraseolóxico galego. Edicións A Nosa Terra, Vigo, 2000.
- Real Academia Galega: Dicionario da Real Academia Galega (versión en liña).
- Rodríguez González, Eladio: Diccionario enciclopédico gallego castellano, vols. I (1958), II (1960) e III (1961). Consultado no Dicionario de Dicionarios da lingua galega (dirixido por Antón Santamarina).
- Vázquez Saco, Francisco: Refraneiro galego e outros materiais de tradición oral. En Cadernos de Fraseoloxía Galega, 5, 2003. Centro Ramón Piñeiro para a Investigación en Humanidades.
