Morre un motorista duns 40 anos ao chocar contra un coche no Pereiro de Aguiar
Ata o lugar trasladouse un helicóptero medicalizado, pero xa nada se puido facer por salvar a vida deste home.
Por Galicia Confidencial | OURENSE | 07/06/2020 | Actualizada ás 13:40
Un motorista duns 40 anos de idade morreu este domingo nunha colisión contra un vehículo producida nun cruzamento do municipio ourensán do Pereiro de Aguiar.
Segundo informan fontes municipais a Europa Press, o sinistro ocorreu sobre as 11:15 horas no lugar de Parada, na parroquia de Sabadelle, concretamente na estrada que vai cara a San Miguel do Campo.
O 112 Galicia, tras ter coñecemento do accidente a través do persoal do 061- Urxencias Sanitarias, deu o aviso á Garda Civil de Tráfico, ao GES do Pereiro de Aguiar e aos bombeiros de San Cibrao das Viñas. Por parte do servizo sanitario, desprazouse ata o lugar dos feitos un helicóptero medicalizado con base en Ourense.
Con todo, a pesar dos seus esforzos, o persoal sanitario non puido facer nada por salvar a vida do motorista, un home duns 40 anos de idade, de acordo coas fontes consultadas.
