Por Europa Press / Redacción | SANTIAGO DE COMPOSTELA | 09/06/2020 | Actualizada ás 10:35
No sector teatral teñen claro que "incerteza" será a palabra que mellor defina o futuro da profesión baixo a "nova normalidade". Para tentar botar luz sobre o día despois dun eido xa acostumado ás dúbidas, a revista Erregueté e Zona Zero veñen de dar luz a unha iniciativa de conferencias dixitais nas que diversas figuras do sector darán a súa visión dos retos a afrontar trala pandemia.
A convocatoria, titulada "Conversas In-certas", comezará este vindeiro xoves 11 cun dos temas que máis preocupa ós profesionais dramáticos, a programación teatral ante un outono "imposible de prever". A cuestión será afrontada por Pilar Portela, directora-xerente do Pazo da Cultura de Pontevedra e presidenta da Asociación de Xestores Culturais.
En semanas posteriores, a cita abranguerá dende o futuro da escritura á interpretación de obras, pasando pola crítica ou a dirección. A convocatoria é de balde e queda fixada para as 18:00 horas. Os interesados poden inscribirse e enviar preguntas ao mail "conversasincertas@gmail.com". Iso si, as cuestións terán que chegar "por anticipado, para non sumar incerteza á incerteza", apuntan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.