Denuncian á Xunta por permitir visitas nunha residencia "incumprindo os protocolos de seguridade"
A CIG interpuxo o trámite contra a Consellería de Política Social trala reapertura das visitas a residentes nun centro da provincia de Ourense.
- Comeza a batalla legal dos familiares de anciáns mortos: "hai responsabilidades de altos cargos da Xunta"
- A recuperación dos contaxios nas residencias de maiores de Galicia está estancada
Por Galicia Confidencial | SANTIAGO DE COMPOSTELA | 09/06/2020 | Actualizada ás 21:40
A CIG ven de presentar unha denuncia ante a Inspección de Traballo e Seguridade Social tras o restablecemento do sistema de visitas a residentes na Residencia do Maior Nosa Sra. dos Milagres, situado no concello ourensano de Barbadás.
Dende o sindicato defenden que o espazo habilitado para a realización das visitas, a capela da residencia, "incumpre os protocolos de seguridade e saúde laboral". Á marxe, a CIG denuncia que a localización das visitas foi imposta "sen consultar ao Comité de Empresa nin ao Comité de Seguridade e Saúde".
A Confederación fixo fincapé na necesidade de adaptar o espazo con "todas as medidas de seguridade para evitar un contaxio" atendendo á situación dos residentes, "especialmente sensibles" á COVID "tanto polas súas patoloxías como pola súa idade". O sindicato fixo ademais un chamamento a evitar "riscos" de cara á propagación da enfermidade logo de "tanto esforzo por parte das traballadoras e traballadores".
